Nágrannavarsla

Garðabær hóf innleiðingu á nágrannavörslu í hverfum bæjarins haustið 2008 og hefur hún verið kynnt í öllum hverfum bæjarins.

Verkefnið er skipulagt þannig:

  1. Þegar byrjað er að innleiða nágrannavörslu í hverfi er öllum íbúum hverfisins boðið á fund þar sem verkefnið er kynnt. Á fundunum greinir lögreglan frá tölfræði um fjölda brota í Garðabæ og starfsmaður atvinnu- og tækniþróunarnefndar fræðir íbúa um hvert þeirra hlutverk getur verið í því að gæta eigna sinna og nágranna sinna.
  2. Á fundinum eru valdir tengliðir úr hópi íbúa í hverri götu, svokallaðir götustjórar, sem sjá m.a. um að upplýsa nýja íbúa um verkefnið svo og þá íbúa götunnar sem ekki komu á fundinn.
  3. Íbúum eru afhendir límmiðar til að líma í rúður húsa sinna sem segja að í götunni sé nágrannavarsla.
  4. Skilti er sett upp í götunum sem gefur nágrannavörslu til kynna.

Samstarfsverkefni Garðabæjar og lögreglunnar


Verkefnið var undirbúið af atvinnu- og tækniþróunarnefnd bæjarins og er samstarfsverkefni Garðabæjar og lögreglu höfuðborgarsvæðisins.  

Verkefnið byggir á samskonar verkefnum sem sett hafa verið á laggirnar í nokkrum götum í nágrannasveitarfélögum og þykja hafa skilað góðum árangri. 

Góð forvörn

Nágrannavarsla er ein besta forvörn sem hægt er að grípa til gagnvart innbrotum, þjófnuðum og skemmdarverkum í íbúðarhverfum. Nágrannavarsla er ekki löggæsla heldur snýst hún um að íbúar standi saman og hafi auga með umferð um götuna sína. Verði íbúar varir við grunsamlegar mannaferðir, t.d. við hús nágranna sem þeir vita að er fjarverandi, er þeirra hlutverk að hringja í 112 og gefa lýsingu á atburðinum.

Götustjórar

Götustjórar gegna lykilhlutverki í nágrannavörslunni. Til að nágrannavarslan sé virk þarf að hafa að minnsta kosti einn götustjóra í hverri götu.

Götustjóri er eins konar verkstjóri nágrannavörslunnar í sinni götu. Hann er tengiliður götunnar við lögregluna og Garðabæ, hann hefur lista yfir íbúa í götunni og hann sér um að upplýsa nýja íbúa um nágrannavörsluna.  Æskilegt er að götustjóri boði til íbúafundar eða götugrills einu sinni á ári. Hægt er að hafa þá reglu að velja nýjan götustjóra við það tilefni. Þannig verða fleiri virkir og meðvitaðir um nágrannavörsluna.

Garðabær boðar götustjóra til fræðslufundar einu sinni til tvisvar á ári.

Upplýsingar um nágrannavörslu veitir:

Sunna Sigurðardóttir
þjónustustjóri
s: 525 8502
sunnas@gardabaer.is

Gagnlegar slóðir þar sem fjallað er um nágrannavörslu: