Menning í Garðabæ - rafrænt efni

Menningarviðburðir sem Garðabær býður öllum að njóta heima í stofu.

Tónlist, hönnun, rannsóknir, bæjarlistamenn, myndlist, bókmenntir, handverk og arkitektúr í Garðabæ eru efni þáttanna sem eru birtir á vimeo-rás Garðabæjar. 

Menning í Garðabæ - vimeorás. 

Vegna Covid hefur ekki verið hægt að halda úti menningarstarfi með hefðbundnum hætti síðastliðið ár og menningin er því færð inn á heimili íbúa með rafrænum hætti þetta árið. Efnið var tekið upp haustið 2020 og á undanförnum vikum hefur nýr þáttur verið birtur vikulega á vimeorásinni og einnig hefur þeim verið deilt á fésbókarsíðu Garðabæjar.

Meðal efnis sem er aðgengilegt á menningarrásinni:

Aðventudagskrá

Guðfinna Dóra og söngelska fjölskyldan hennar. Hátíðleg jólalög sungin af Guðfinnu Dóru Ólafsdóttur ásamt eiginmanni hennar Rúnari Einarssyni og börnum þeirra Hallveigu, Hildigunni, Ólafi og Þorbirni. Barnabörnin Finnur, Freyja, Fífa, Brynhildur Ruth, Þorgerður María og Ragnheiður Dóra koma einnig fram.  Tekið upp í Vídalínskirkju í desember 2020.
Guðfinna Dóra

Ingibjörg Guðjónsdóttir, sópran og bæjarlistamaður Garðabæjar 2013, ásamt góðum gestum.   Íslensk lög í jazzútsetningum, lög eftir Tryggva M. Baldvinsson m.a. við ljóð Þórarins Eldjárn og aríur eftir Puccini og Mozart. Með Ingibjörgu leikur á píanó Ástríður Alda Sigurðardóttir, á klarinettu Ármann Helgason og á rafgítar Ómar Guðjónsson og saxófón Óskar Guðjónsson. Upptakan var gerð í Tónlistarskóla Garðabæjar.

Ingibjörg Guðjónsdóttir

Ljósin á jólatré á Garðatorgi tendruð og fleira fjör fyrir fjölskylduna í upphafi aðventu. Föndur, jólasveinafjör, Grýla og Leppalúði, söngstund í Króki.
Aðventuþáttur 

Rithöfundaspjall Bókasafns Garðabæjar tekið upp í nóvember 2020.  Auður Aðalsteinsdóttir bókmenntafræðingur stjórnar rithöfundaspjalli en Vilborg Davíðsdóttir kynnir bók sína "Undir Yggdrasil", Gunnar Þór Bjarnason segir frá og les úr bók sinni "Spænska veikin, Katrín Júlíusdóttir les úr fyrstu skáldsögu sinni "Sykur" og Hallgrímur Helgason les úr og segir frá ljóðabókinni "Við skjótum títuprjónum".

Rithöfundaspjall

Listamenn sem tengjast bænum

Bjarni Thor Kristinsson, óperusöngvari og bæjarlistamaður Garðabæjar 2020, syngur uppáhalds lögin sín. Á Sprengisandi, Tondeleo og aría Sarastro úr Töfraflautu Mozarts eru meðal uppáhaldslaga Bjarna Thors sem er bæjarlistamaður Garðabæjar 2020. Upptakan fór fram í Kirkjuhvoli Vídalínskirkju og með Bjarna Thor leikur Ástríður Alda Sigurðardóttir á píanó.

Bjarni Thor Kristinsson

Kristín Helga Gunnarsdóttir, rithöfundur og bæjarlistamaður Garðabæjar árið 2001, fer með áhorfendur í sögugöngu og les valda kafla úr bókum sínum.

Kristín Helga Gunnarsdóttir

Hugljúfir tónleikar með þeim hjónum Jóhönnu Guðrúnu Jónsdóttur og Davíð Sigurgeirssyni en þau eru bæjarbúum að góðu kunn úr starfi í Vídalínskirkju þar sem þau stjórna kórum o.fl.

Jóhanna Guðrún og Davíð á hugljúfum nótum

Bjarni Bjarnason, rithöfundur og bæjarlistamaður Garðabæjar árið 2019 segir frá hvernig rithöfundar fá hugmyndir að skáldsögum og hvernig sögulegar heimildir eru notaðar.

Bjarni Bjarnason rithöfundur

Jazzstund í Sveinatungu var tekin upp í október 2020. Þar koma fram 
Sigurður Flosason, Kristjana Stefánsdóttir, Ómar Guðjónsson, Einar Scheving og Þorgrímur Jónsson.
Jazzstund í Sveinatungu

Hönnunarsafn Íslands og útilistaverk í bænum

Einnig má finna upptöku af leiðsögn um valin útilistaverk Garðabæjar,  fuglasmiðju úr Hönnunarsafni Íslands, leiðsögn um Hönnunarsafnið og sýninguna 100% ULL, fyrirlestur Godds í Hönnunarsafninu á menningarrás Garðabæjar á Vimeo.