Hreinsunarátak og vorhreinsun 2025
Gerum Garðabæ að snyrtilegasta bæ landsins!
Vorhreinsun lóða 2025 verður 9.-22. maí
Eins og síðustu ár eru Garðbæingar hvattir til að hreinsa lóðir sínar í sameiginlegu átaki dagana 9.- 22. maí.
Vorhreinsun lóða í Garðabæ verður með sama sniði í ár og í fyrra, þ.e.a.s. að ríflega 30 gámum verður komið fyrir í bænum til að taka á móti garðaúrgangi sem íbúar koma sjálfir í gámana. Fjöldi gáma endurspeglar þann mikla dugnað sem Garðbæingar hafa sýnt í vorhreinsun sinni. Vinsamlegast athugið að ekki má setja garðaúrganginn í pokum í gámana heldur skal losa úr pokunum beint í þá.
Eldri borgurum og þeim sem þurfa aðstoð við að koma garðaúrgangi í gámana er bent á að hafa samband við þjónustumiðstöð Garðabæjar, sem verður þeim innan handar.
Staðsetningu gáma má sjá á þessu korti (PDF)
Árlegt hreinsunarátak Garðabæjar verður að þessu sinni dagana 28. apríl – 12. maí 2025 en þá eru nágrannar, íbúasamtök, félagasamtök, íþróttafélög og skólar hvattir til að taka þátt. Hópar geta sótt um að fá úthlutuð svæði til að hreinsa í sínu nærumhverfi og geta fengið styrk í fjáröflunarskyni eða til að halda grillveislu í lok góðrar tiltektar. Áhugasamir hópar geta haft samband við verkefnastjóra garðyrkjudeildar lindajo@gardabaer.is.
Íbúar eru hvattir til að sýna gott fordæmi með því að taka nærumhverfi í fóstur og hlúa að því. Starfsmenn bæjarins munu hirða upp alla poka og annað eftir ruslatínslu bæjarbúa, hópa eða einstaklinga. Hægt er að nálgast poka í áhaldahúsinu við Lyngás 18 og þátttakendur eru hvattir til að flokka plast sérstaklega frá öðru rusli í glæran plastpoka. Þátttakendur eru beðnir um að fylla ekki poka þannig að þeir verði of þungir.