Tónlistarnæring með Voces Thules
Voces Thules mætir á Tónlistarnæringu í Garðabæinn með sitt hafurtask sem samanstendur af pípum, trommum, gígjum, langspilum og lýrukössum sem hafa safnast í sarpinn á rúmum 30 starfsárum.
Sönghópurinn mun draga fram í dagsljósið sjaldheyrða söngva úr fjársjóðskistu fyrri alda sem laða fram stemninguna í upphafi aðventu. Einnig bregður fyrir söngvum sem hrífa okkur aftur á miðaldir í einu vetfangi og minna á áskoranir sem tilvera forfeðranna bauð upp á, sem raunar var sjaldnast neitt val um að takast á við.
Efnisskráin spannar tíu aldir og segir sögur höfðingja jafnt sem almúga.
Tónlistarnæring fer fram fyrsta miðvikudag í mánuði og það er menningar- og safnanefnd sem kostar tónleikaröðina sem haldin er í samstarfi við Tónlistarskóla Garðabæjar. Listrænn stjórnandi er Ólöf Breiðfjörð.
Tónleikarnir eru 30 mínútur að lengd og aðgangur er ókeypis.