Hvatapeningar

Hvatapeningana er hægt að nýta til að greiða niður gjöld í skipulögðu íþrótta-, tómstunda- og æskulýðsstarfi sem stundað er reglulega.  Skilyrði þess að hægt sé að nýta hvatapeningana er að um skipulagt starf sé að ræða sem er stundað undir leiðsögn þjálfara eða leiðbeinanda og nær yfir eina önn eða að lágmarki 10 vikur. Undantekning eru 5 og 6 ára börn þar sem lágmarkstímalengd námskeiða er 20 kennslustundir óháð vikufjölda. Þetta á t.d. við um allt íþróttastarf sem stundað er á vegum viðurkenndra íþróttafélaga, sumarnámskeið, dans í dansskólum og skátastarf.

Hvatapeninga ársins 2025 er hægt að nýta vegna reikninga sem gefnir eru út á árinu 2024 og 2025. Réttur til hvatapeninga fyrir árið 2025 fellur niður í árslok. Ónýttir hvatapeningar geymast ekki milli ára. Hvatapeninga líðandi árs er ekki hægt að nýta til að greiða reikninga námskeiðs sem byrjar á næsta ári á eftir.

Hægt er að sækja um „viðbótar hvatapeninga“ krónur 15.000,- í þjónustugátt Garðabæjar ef heildartekjur heimilis eru að meðaltali undir 856.000,- kr. á mánuði hjá einstaklingi, eða 1.049.000,- kr. hjá sambýlisfólki (m.v. launavísitölu 1. janúar 2025). Miðað er við meðaltekjur samkvæmt staðgreiðsluskrá fyrir síðustu þrjá mánuði þegar umsókn er send inn.

Hvatapeningana er ekki hægt að nýta til að kaupa árskort í líkamsræktarstöðvum en skipulögð unglinganámskeið og dansnámskeið innan líkamsræktarstöðva falla undir styrkinn. Undantekning frá þessu eru ungmenni í þremur elstu árgöngunum, þ.e. 16, 17 og 18 ára (fædd 2007, 2008 og 2009), þau geta nýtt hvatapeningana til að kaupa kort í líkamsræktarstöðvum.

Hægt er að nýta hvatapeninga til þess að greiða niður tónlistarnám, bæði í Tónlistarskóla Garðabæjar og öðrum tónlistarskólum. 

Ástæða þess að sveitarfélög um land allt hafa tekið upp slíkar hvatagreiðslur eru niðurstöður langtíma rannsókna á líðan íslenskra barna og ungmenna. Rannsóknirnar sýna að þátttaka í slíku starfi, sem nær yfir að minnsta kosti 10 vikur, hefur marktæk áhrif á bætta vellíðan og minni „vandamál“. Íþróttastarf og skátastarf vegur þar langþyngst á metum.

Reglur um hvatapeninga (sjá undir flokknum íþróttir og tómstundir)

Leiðbeiningar um notkun hvatapeninga

Leiðir til að nýta hvatapeninga

Ef félag sem barnið er að iðka tómstundir hjá er tengt Sportabler eða XPS skráningarkerfinu á að nýta hvatapeninga beint í gegnum Sportabler eða XPS kerfið. Þá er hakað í að nota hvatapeninga og æfingargjöldin lækka sem nemur inneign hvatapeninga. Þegar hvatapeningar eru nýttir í gegnum skráningarkerfi Sportabler eða XPS þarf að haka í kassann "Nota hvatapeninga Garðabæjar" og þá lækkar upphæð æfingagjalda um þá upphæð sem nemur inneign hvatapeninga fyrir barnið. Athugið að ekki er hægt að endurgreiða eða bakfæra styrk frá félögum þegar foreldri/forráðamaður hefur ráðstafað styrknum til félags. Ekki er hægt að koma með reikninga til endurgreiðslu hvatapeninga vegna félaga sem tengd eru Sportabler eða XPS.

Til að nýta hvatapeningana til félaga sem ekki eru tengd Sportabler eða XPS er hægt að koma með reikning frá félaginu í þjónustuver Garðabæjar og fá hvatapeninga endurgreidda. 

Ferli þessara tveggja leiða til að nýta hvatapeninga má sjá hér að neðan.

Nýta þarf hvatapeninga ársins 2025 fyrir áramót. Kvittunum (þegar það á við) á að skila fyrir lokun þjónustuvers Garðabæjar þann 18. desember.

Upplýsingar eru einnig veittar í þjónustuveri Garðabæjar, s. 525 8500, eða í netfangi gardabaer@gardabaer.is

Hvatapeningar - Sportabler eða XPS

Hvatapeningar hjá félögum innan eða utan Garðabæjar sem nýta skráningarkerfið Sportabler eða XPS

Það er einfalt að nýta hvatapeningana um leið og barnið er skráð í félagið. 

1. Þegar þú ert búin/n að skrá þig inn í Sportabler smellir þú á Námskeið/flokkar í boði, fyrir aftan nafnið á því barni sem þú ætlar að skrá. 
2. Þú finnur rétta deild, flokk og námskeið og smellir á Skráning á námskeið. 
3. Á síðunni sem þá kemur upp færðu þann möguleika að haka í reitinn  Nota hvatapeninga Garðabæjar.  Ef þú gerir það, kemur fram hversu mikla hvatapeninga barnið á inni og sú upphæð dregst frá gjaldinu sem þú átt að greiða.  Ef þú vilt ekki nota alla hvatapeningana geturðu breytt upphæðinni. 
   
4. Þú gengur síðan frá greiðslunni með því að velja hvernig greiðslu verður háttað og aðrar upplýsingar sem beðið er um.  Þú borgar gjaldið að frádregnum hvatapeningunum. 
   
   Athugið að hvatapeningar eru ekki endurgreiddir vegna félaga sem tengd eru Sportabler eða XPS.

Hvatapeningar - önnur félög ekki tengd Sportabler eða XPS

Ef nýta á hvatapeningana til annarra félaga en þeirra sem nota skráningarkerfi Sportabler eða XPS þarf að greiða fullt gjald til félagsins, og koma með frumrit af kvittun í þjónustuver Garðabæjar. 

Þeir sem æfa með félögum tengdum Sportabler eða XPS en hafa greitt fullt gjald geta tímabundið nýtt sér þessa sömu leið til að ná í hvatapeningana.

Þeir sem greiða fullt gjald en ætla að fá hvatapeninga endurgreidda þurfa að framvísa reikningi með eftirfarandi upplýsingum:

a) Nafni og kennitölu félags 
b) Dagsetningu greiðslu 
c) Fyrir hvað er verið að greiða 
d) Æfingatímabili 
e) Nafni og kennitölu iðkanda

Jafnframt þurfa að fylgja upplýsingar um nafn greiðanda, kennitölu og símanúmer.

Hægt er að senda reikninginn á gardabaer@gardabaer.is, en á reikningnum þurfa að koma fram allar þær upplýsingar sem beðið er um hér að ofan sem og bnúmer bankareiknings sem endurgreiða á inn á. Einnig er hægt er að koma með reikninginn í þjónustuver Garðabæjar eða senda hann í pósti en þá verða að fylgja með upplýsingar um bankareikning sem leggja á hvatapeningana inn á og kennitala reikningseiganda.

Póstfangið er:
Þjónustuver Garðabæjar
Garðatorgi 7
210 Garðabær