Jazzhátíð Garðabæjar
Á sumardaginn fyrsta, 22. apríl, hefst Jazzhátíð Garðabæjar en þetta er í fimmtánda sinn sem hátíðin er haldin.
Á sumardaginn fyrsta, 22. apríl, hefst Jazzhátíð Garðabæjar en þetta er í fimmtánda sinn sem hátíðin er haldin. Í fyrra féll hátíðin niður en listrænn stjórnandi hátíðarinnar, Sigurður Flosason, tók þá ákvörðun í samráði við menningarfulltrúa Garðabæjar að hátíðin færi fram með beinu streymi frá Tónlistarskóla Garðabæjar að þessu sinni.
Fylgist með á fésbókarsíðu Garðabæjar og fésbókarsíðu Jazzhátíðar Garðabæjar.
Sálgæslan og gestir - Sumardaginn fyrsta 22. apríl kl. 20
Fyrstu tónleikarnir fara fram þann 22. apríl klukkan 20:00 og verður streymt beint frá fésbókarsíðu Garðabæjar. Fram koma Sálgæslan og gestir hennar en það eru Sigurður Flosason sem leikur af sinni alkunnu snilld á saxófón, Þórir Baldursson á Hammondorgel, Andrés Þór Gunnlaugsson á gítar og trommuleikarinn knái Einar Scheving. Með sveitinni syngja þau Andrea Gylfadóttir, KK, Jógvan Hansen og Rebekka Blöndal. Flutt verða lög og textar Sigurðar Flosasonar af plötunni Blásýru sem kom út fyrir síðustu jól.
Kvintett Jóels Pálssonar - föstudag 23. apríl kl. 20
Föstudagskvöldið 23. apríl kl. 20 leikur Kvintett Jóels Pálssonar lög af plötunni Horn sem kom út fyrir 10 árum en Jóel var tilnefndur til Tónlistarverðlauna Norðurlandaráðs fyrir verk sín á plötunni.
Laugardagur 24. apríl - Kl. 15 Nútímalegur jazz undir austrænum áhrifum -Kl. 20 ADHD
Á laugardeginum, 24. apríl fara fram tvennir tónleikar, aðrir kl. 15 en hinir kl. 20
Á tónleikunum sem verður streymt kl. 15 verður leikinn nútímalegur jazz sem er undir áhrifum frá austrænni heimstónlist en það eru Sigmar Þór Matthíasson kontrabassaleikari og Haukur Gröndal klarinettuleikari, Ásgeir Ásgeirsson sem leikur á oud, Ingi Bjarni Skúlason á píanó auk Matthíasar Hemstock trommuleikara.
Lokatónleikarnir kl. 20 þann 24. apríl eru með sveitinni ADHD en það eru bræðurnir Óskar og Ómar Guðjónssynir sem leika ásamt Tómasi Jónssyni á Hammond orgel og Magnúsi Tryggvasyni Eliassen á trommur.
Óhætt er að búast við glæsilegri og fjölbreyttri dagskrá sem fólk getur notið í rólegheitum heima.