Vífilsstaðahraun, Maríuhellar og Vatnsmýri. Skipulagslýsing
Skipulagslýsing
19.10.2021
Að tillögu
skipulagsnefndar samþykkti bæjarstjórn Garðabæjar á fundi sínum þann 7. október
2021 lýsingu að gerð deiliskipulags í samræmi við 1. mgr. 40. gr. skipulagslaga
nr. 123/2010.
Skipulagsnefnd
Garðabæjar samþykkti á fundi sínum þann 29. apríl 2021 að fela tækni-og
umhverfissviði að hefja vinnu við mótun tillögu að deiliskiplagi Fólkvangs í
Vífilsstaðahrauni, Maríuhellum og Vatnsmýrinni. Stærsti hluti svæðisins, ásamt
Garðahrauni, var friðlýst 2014 og var friðlýsingin endurskoðuð 2021 þar sem
Vatnsmýrinni var bætt við.
Samhliða því að
skipuleggja fólkvanginn í samræmi við friðlýsinguna þarf að tengja saman
hverfin sem eru norðan, sunnan og vestan við svæðið með stígum. Sérstaklega
þarf að tryggja aðgengi að íþróttasvæðinu, sem er norðan við fólkvanginn, úr
hverfunum umhverfis. Skilgreint verður fyrirkomulag göngu-, hjóla- og reiðstíga
ásamt því að útfæra útivistar- og almenningssvæði. Í rammaskipulagi svæðisins
er gert ráð fyrir stíg til suðurs frá Vífilsstaðaspítala yfir Vatnsmýri þar sem
hann endar í göngu- og fuglaskoðunarbrú.
Deiliskipulagssvæðið
er um 70 ha að stærð og afmarkast það af Reykjanesbraut í vestri, stofnstíg í
norðri, Heiðmörk í austri og Urriðaholti í suðri. Göngustígur liggur um norður-
og austurhluta svæðisins og reiðleið um austur og suðurhluta svæðisins. Aðkoma
akandi að Vífilsstaðahrauni og Vatnsmýrinni er um Elliðavatnsveg og eru stór
bílastæði við Vífilsstaðavatn en einnig er lítið bílastæði við veginn
Vífilsstaðahrauns megin. Aðkoman að Maríuhellum er um Heiðmerkurveg og eru
bílastæði rétt hjá hellunum við gatnamót Heiðmerkur- og Elliðavatnsvegar.
Gangandi og hjólandi komast um stíga frá Urriðaholti og einnig frá Lundar- og
Flatarhverfi um undirgöng undir Reykjanesbraut.
Lýsingin verður í samræmi við 2. mgr. 40. gr. sömu laga send umsagnaraðilum. Umsagnaraðilar eru: Skipulagsstofnun, Náttúrufræðistofnun Íslands, Heilbrigðiseftirlit Hafnarfjarðar og Kópavogssvæðis, Umhverfisstofnun, Minjastofnun og Vegagerðin.
Lýsingin verður
aðgengileg í þjónustuveri og á heimsíðu Garðabæjar. Birt verður auglýsing um
kynningu hennar í Fréttablaði, Garðapósti og á heimasíðu.
Hægt er að skila inn
ábendingum vegna lýsingarinnar á netfangið skipulag@gardabaer.is
eða í þjónustuver til og með mánudeginum 8. nóvember nk.