19. júl. 2001

Íbúafjöldi i Garðabæ meira en tvöfaldast til 2024

Íbúum Garðabæjar fjölgar um 157% til ársins 2024 samkvæmt tillögu að sameiginlegu svæðisskipulagi sveitarfélaganna átta á höfuðborgarsvæðinu sem kynnt var í gær. Þetta er í fyrsta sinn sem þessi sveitarfélög gera sameiginlegt svæðisskipulag og verður tillagan kynnt almenningi áður en hún fer í lögformlega kynningu síðar á árinu. Sveitarfélögin sem standa að gerð skipulagsins eru: Garðabær, Reykjavík, Kópavogur, Hafnarfjörður, Mosfellsbær, Seltjarnarnes, Bessastaðahreppur og Kjósarhreppur. Skipulagssvæðið afmarkast af sveitarfélagsmörkum Kjósarhrepps í norðri og Hafnarfjarðar í suðri. Í skipulaginu er tekið á ýmsum þáttum sem tengjast skipulagi þ.e. byggðaþróun, landnotkun, umhverfismálum, samöngum og veitukerfum auk þess sem samfélagsleg þróun er skoðuð. Í skipulaginu er gert ráð fyrir að íbúum á höfuðborgarsvæðinu fjölgi um 60 þúsund til ársins 2024 og verði þá um 228.000 talsins. Þetta er um 36% fjölgun íbúa. Íbúðum á svæðinu fjölgi á sama tíma um 31.700 og störfum um 35 þúsund. Íbúum Reykjavíkur fjölgar mest á tímabilinu en hlutfallslega verður mest fjölgun íbúa í Garðabæ, þar sem gert er ráð fyrir að íbúar verði 20.300 árið 2024. Þetta á að gerast að mestu leyti með uppbyggingu tveggja nýrra hverfa, Garðaholts og Urriðaholts. Urriðaholt er jafnframt einn af þremur stöðum þar sem gert er ráð fyrir að störfum í hátækniiðnaði fjölgi mest. Hinir staðirnir eru Keldnaland og Vatnsmýrin. Reiknað er með að um 40% starfa í þessari atvinnugrein dreifist á þessi þrjú svæði. Í tillögunni er lögð áhersla að þétta byggðina, bæði núverandi byggð og byggð framtíðarinnar. Um leið verði hið græna bakland byggðarinnar varðveitt og endurbætt og grænir geirar hafðir á milli byggðanna. Gert er ráð fyrir að þétta megi núverandi byggð með um sjö þúsund íbúðum á tímabilinu en alls þurfi tæplega 1.600 hektara landsvæði fyrir nýja byggð. Reiknað er með að um helmingur flugvallarsvæðisins í Vatnsmýrinni byggist á tímabilinu og að byggð þar verði þéttari en víðast annars staðar á höfuðborgarsvæðinu. Fjölgun starfa í þekkingariðnaði og þéttari byggð munu hvorutveggja auka svipmót höfuðborgarsvæðisins sem alþjóðlegrar borgar en framtíðarsýn fyrir svæðið er að íbúar þess muni byggja afkomu sína á athafnalífi og viðskiptaumhverfi sem er alþjóðlegt. Aldurssamsetning íbúa breytist mikið á skipulagstímanum þar sem eldra fólki fjölgar mun meira en yngra fólki. Búist er við að íbúum á aldrinum 5-24 ára fjölgi um 16% til 2024, en fólki yfir sextugt um 105%. M.a. vegna þessa er gert ráð fyrir að íbúum í hverri íbúð fækki. Fleiri íbúum fylgir meiri umferð. Gert er ráð fyrir að umferð bíla aukist um 40% til 2024. Þetta kallar á umtalsverðar og kostnaðarsamar úrbætur á vegakerfinu. Þrátt fyrir það er gert ráð fyrir að þjónustustig bílaumferðar lækki almennt séð, einkum vestan Kringlumýrarbrautar og næst miðkjörnum. Brýn ástæða er talin til að efla almenningssamgöngur enda talið að fleiri vilji nýta sér þjónustu almenningsvagna þegar byggðin þéttist. Tillagan sem nú hefur verið kynnt er sameiginleg tillaga ráðgjafa og samvinnunefndar að svæðisskipulagi. Stefnt er að því að svæðisskipulagið verði staðfest fyrir lok þessa árs. Svæðisskipulagið er rammi sem sveitarfélögin skuldbinda sig til að fylgja við gerð aðalskipulags og leið til festa betur í sessi þá samvinnu sem þegar er með sveitarfélögunum á ólíkum sviðum. Í tillögunni sem kynnt er nú segir að með gerð svæðisskipulags verði höfuðborgarsvæðið sterkara sem heild og samkeppnishæfara út á við.