Skógarganga um Vífilsstaði
Siðastliðið þriðjudagskvöld 12. júlí stóð Skógræktarfélag Garðabæjar fyrir göngu með gróður- og byggingarsögulegu ívafi um Vífilsstaði og nágrenni undir leiðsögn Arndísar Árnadóttur list- og sagnfræðings. Inn í þetta fléttaði Erla Bil Bjarnardóttir garðyrkjustjóri Garðabæjar ýmsum fróðleik um gróður, fólk og kartöflurækt á Vífilsstöðum.
Gengið var um trjálundina á staðnum, gróðurinn skoðaður með vísun í upphaf trjáræktar á reitnum norðan við Vífilsstaðahælið fyrir nær hundrað árum. Einnig var vitjað um gamla bæjarstæðið á Vífilsstöðum niður við lækinn og spáð í gildi fornminja. Síðan var gengið um stóru trjásveigana á túninu sunnan við hælið sem gróðursettir voru fyrir hartnær fimmtíu árum. Auðsjáanlega hefur verið hugað að hönnun á umhverfi staðarins og sem dæmi má nefna að
Jón H. Björnsson fyrsti íslenski landlagsarkitektinn var fenginn til að hanna trjáreitina á túninu sunnan við aðalbygginguna. Þeir veittu sannarlega skjól fyrir sunnanvindinum, þetta ánægjulega kvöld í hópi gróðurvina og áhugafólks um verndun Vífilsstaða sem höfuðbóls í Garðabæ.