3. jún. 2020

Aukin sálfræðiþjónusta fyrir börn

Gunnar Einarsson, bæjarstjóri og Tanja Dögg Björnsdóttir, framkvæmdastjóri Mín líðan undirrituðu þann 28. maí sl. samning um aukna sálfræðiþjónustu fyrir börn á elsta stigi grunnskóla Garðabæjar sem eru að glíma við kvíða.

Verkefnið er tilraunaverkefni sem unnið verður af sálfræðingi á vegum nýsköpunarfyrirtækisins Mín líðan sem hefur þróað sálfræðiviðtöl í gegnum fjarvinnslu. Nemendur eiga kost á nokkrum viðtölum við sálfræðing á netinu sem aðstoðar þau og leiðbeinir. Fyrstu viðtölin verða í boði fyrir nemendur í Sjálandsskóla nú við lok þessa skólaárs og halda svo áfram þegar skólastarf hefst í haust einnig í öðrum skólum sveitarfélagsins og fram að áramótum. Þá verður verkefnið tekið út og endurmetið.

Eiríkur Björn Björgvinsson, sviðsstjóri fræðslu- og menningarsviðs Garðabæjar,  segir að verkefnið sé hugsað sem viðbót við þá mikilvægu sálfræðiþjónustu sem veitt er af sálfræðingum skólaþjónustu sveitarfélagsins. „Við viljum ná til þeirra nemenda í elstu bekkjum grunnskóla Garðabæjar sem eru að glíma við kvíða og eru ekki að njóta þjónustu okkar sálfræðinga í dag. Við viljum aðstoða þau við að ná tökum á kvíðanum eða leiðbeina þeim um hugsanlega frekari aðstoð. Verkefnið er unnið í fjarþjónustu og áhugaverð leið til að ná til og þjónusta nemendur.“

Mín líðan er ungt fyrirtæki sem veitir nýja leið í sálfræðiþjónustu á Íslandi og er fyrsta íslenska fjargeðheilbrigðisþjónustan sem fær leyfi til reksturs frá Embætti landlæknis. Mín líðan hlaut verðlaun fyrir vefkerfi ársins 2018 á Íslensku vefverðlaununum sem veitt eru af Samtökum vefiðnaðarins.