Börnin mætt á Mánahvol
Fyrstu börnin eru mætt á ungbarnaleikskólann Mánahvol á Vífilsstöðum. Leikskólinn er staðsettur við hliðina á leikskólanum Sunnuhvoli sem er þar fyrir.
-
Börn á Mánahvoli.
Fyrstu börnin eru mætt á ungbarnaleikskólann Mánahvol á Vífilsstöðum. Leikskólinn er staðsettur við hliðina á leikskólanum Sunnuhvoli sem er þar fyrir. Fyrstu vikurnar fór starfsemi skólans fram í húsnæði leikskólanna Krakkakots og Holtakots á Álftanesi en nú eru börnin komin yfir á Vífilsstaðatún.
Til að byrja með verða fjórar deildir opnaðar á Mánahvoli en í lok árs rísa fjórar deildir til viðbótar ásamt starfsmannaaðstöðu. Gert er ráð fyrir að leikskólinn geti verið með pláss fyrir allt að 112 börn þegar allar 8 deildir verða komnar til starfa.
Kristín Hemmert Sigurðardóttir er leikskólastjóri á Mánahvoli og Sigríður Brynjarsdóttir er aðstoðarleikskólastjóri. Þær segja fyrstu dagana hafa gengið vel. „Fyrstu dagarnir á Mánahvoli hafa gengið mjög vel. Börn og starfsfólk er mjög ánægt með þessa fínu aðstöðu hérna á Vífilsstaðatúni. Skólinn er mjög skemmtilegur og skólaandinn er hlýlegur. Megi skólastarfið blómstra á Mánahvoli.“
Gunnar Einarsson bæjarstjóri, Eiríkur Björn Björgvinsson sviðsstjóri fræðslu- og menningarsviðs og Halldóra Pétursdóttir leikskólafulltrúi fóru í heimsókn á Mánahvol í vikunni.
