Forsætisráðherra fékk skilaboð frá börnum í Flataskóla
Ævar Þór Benediktsson barnabókahöfundur gekk á fund forsætisráðherra á föstudaginn síðastliðinn ásamt fulltrúum frá UNICEF á Íslandi. Ævar afhenti Katrínu Jakobsdóttur skilaboð frá börnum í Flataskóla í Garðabæ í tilefni alþjóðlegs dags barna sem var þann 20. nóvember.
-
Ævar afhenti Katrínu loftbelgina.
Ævar Þór Benediktsson barnabókahöfundur gekk á fund forsætisráðherra á föstudaginn síðastliðinn ásamt fulltrúum frá UNICEF á Íslandi. Ævar afhenti Katrínu Jakobsdóttur skilaboð frá börnum í Flataskóla í Garðabæ í tilefni alþjóðlegs dags barna sem var þann 20. nóvember.
Börnin í Flataskóla skrifuðu skilaboð til stjórnvalda á fallega skreytta loftbelgi sem Ævar afhenti Katrínu. Skilaboð barnanna voru meðal annars að öll börn eiga að fá vernd gegn ofbeldi, fá ganga í skóla, fá hreint vatn og heimili, eiga vini og fjölskyldu og að stelpur og strákar eiga jafn mikinn rétt til að tjá sig.
Katrín tók vel í skilaboðin og sagði það vera mikinn heiður að fá þau afhent. „Þetta skiptir mjög miklu máli að fá að heyra hvað börnin hafa að segja,“ sagði Katrín. Hún sagði að á næsta ári væri ætlunin að halda sérstakt barnaþing, í fyrsta skiptið á Íslandi, þar sem börn hvaðanæva af landinu geta sett málefni á dagskrá. Hún sagði einnig að málefni barna væru eitt af forgangsmálum Íslands í Mannréttindaráði Sameinuðu þjóðanna. „Það skiptir máli að passa upp á öll börn í heiminum,“ sagði Katrín.