8. jan. 2023

Hilmar Snær og Ásta eru íþróttamenn Garðabæjar 2022

Íþróttamenn Garðabæjar árið 2022 eru Hilmar Snær Örvarsson skíðamaður og Ásta Kristinsdóttir hópfimleikakona í Stjörnunni. Tilkynnt var um kjör þeirra á íþróttahátíð Garðabæjar sem fór fram í dag, sunnudaginn 8. janúar í Miðgarði.

  • Almar Guðmundsson, bæjarstjóri, Hilmar íþróttakarl ársins, Ásta íþróttakona ársins og Hrannar Bragi Eyjólfsson, formaður íþrótta og tómstundaráðs. Mynd: Garðapósturinn

Íþróttamenn Garðabæjar árið 2022 eru Hilmar Snær Örvarsson skíðamaður og Ásta Kristinsdóttir hópfimleikakona í Stjörnunni. Tilkynnt var um kjör þeirra á íþróttahátíð Garðabæjar sem fór fram í dag, sunnudaginn 8. janúar í Miðgarði.

Einnig voru veittar viðurkenningar fyrir lið og þjálfara ársins. Lið ársins 2022 í Garðabæ er karlasveit meistaraflokks GKG og þjálfarar ársins 2022 eru þau Siggeir Magnússon handboltaþjálfari í Stjörnunni og Auður Íris Ólafsdóttir körfuboltaþjálfari í Stjörnunni.

Íþróttakarl Garðabæjar 2022 – Hilmar Snær Örvarsson

Hilmar Snær Örvarsson skíðamaður hlaut á dögunum nafnbótina „Íþróttamaður ársins“ hjá ÍF (Íþróttasambandi fatlaðra). Hilmar Snær var fyrst kjörinn árið 2020 en hlýtur nú titilinn fyrir sögulegan árangur fyrir Íslands hönd á heimsmeistaramótinu í vetraríþróttum og á vetrar ,,Paralympics“. Á báðum mótum hafnaði Hilmar í 5. sæti í svigkeppni sem er besti árangur Íslands á báðum mótum. Á HM keppti hann líka í stórsvigi þar sem hann hafnaði í 21. sæti en á vetrar-Paralympics féll hann úr leik í stórsvigskeppninni. Hilmar Snær hefur tvisvar áður verið kjörinn íþróttakarl Garðabæjar.

Íþróttakona Garðabæjar 2022 – Ásta Kristinsdóttir

Ásta Kristinsdóttir varð íslands- og bikarmeistari í hópfimleikum með kvennaliði Stjörnunnar. Ásta er einn af lykilmönnum liðsins, er í öllum sex stökkumferðunum og með hæsta erfiðleika í öllum stökkum. Einnig sýndi hún glæsilega frammistöðu á dansgólfinu. Ásta var einnig lykilmanneskja í kvennalandsliðinu á Evrópumótinu í hópfimleikum í september 2022. Hún var ein af sex konum sem var valin í úrvalslið mótsins, „All star“ liðið fyrir frammistöðu sína á dýnu á mótinu. Núna í desember keppti Ásta á alþjóðlegu móti sem nefnist ,,Face off“ þar sem keppt er í mismunandi þrautum og er markmiðið að lenda stökk með hæstan erfiðleika með ákveðinni uppsetningu. Í ár var í fyrsta sinn keppt í kvennaflokki og Ásta var fyrst kvenna til að vinna þann flokk. Hún er fyrirmyndar afrekskona í fimleikum og sýnir mikinn metnað til að ná árangri í íþróttinni. Ásta var á dögunum útnefnd í 2.-3. sæti sem fimleikakona ársins hjá Fimleikasambandi Íslands.

Lið ársins 2022 - Karlasveit GKG

Karlasveit meistaraflokks GKG sigraði á íslandsmóti golfklúbba í efstu deild. Þetta var áttundi sigur karlaliðsins frá upphafi, en fyrsti sigurinn kom 2004.

Undirbúningur liðsins var mjög faglegur og frábær liðsandi gerði gæfumuninn í jafnri keppni og stóðu allir liðsmenn fyrir sínu og skiluðu stigum fyrir heildina.

Liðsmenn sveitarinnar voru: Aron Snær Júlíusson, Breki G. Arndal, Guðjón Frans Halldórsson, Gunnlaugur Árni Sveinsson, Hjalti Hlíðberg Jónasson, Kristófer Orri Þórðarson, Ragnar Már Garðarsson, Sigurður Arnar Garðarsson. Mynd: Garðapósturinn

Þjálfari: Andrés Jón Davíðsson.

Með sigrinum vann sveitin sér inn þátttökurétt á EM klúbbliða (European Club Team Trophy). Fyrir hönd GKG léku Gunnlaugur Árni, Kristófer Orri og Hjalti Hlíðberg. Þeir náðu prýðisárangri og lentu í 13. sæti af 22 liðum.

Þjálfarar ársins 2022


 Þjálfarar ársins 2022 í Garðabæ eru þau Siggeir Magnússon handboltaþjálfari í Stjörnunni og Auður Íris Ólafsdóttir körfuboltaþjálfari hjá Stjörnunni og eru þau bæði sannarlega vel að titlinum komin.  Mynd: Garðapósturinn

  • Siggeir Magnússon, handboltaþjálfari Stjörnunni

 

Siggeir hefur þjálfað hjá handboltanum í mörg ár ásamt því að sjá um boltaskóla handboltans sem nýtur gríðarlega vinsælda hjá íbúum Garðabæjar. Námskeiðin í boltaskólanum sem hann og kona hans Guðný Gunnsteinsdóttir sjá um á laugardagsmorgnum eru alltaf uppseld og segir það margt um fagmennskuna.

Á þessu tímabili þjálfar Siggeir 9. flokk kk/kvk ásamt því að vera þjálfari 8. flokks kvenna. Allur undirbúningur, stjórnun æfinga ásamt áhuga hans á þjálfun er til fyrirmyndar enda er hann menntaður íþróttakennari með marga ára reynslu varðandi kennslu og þjálfun.

Það hefur verið mikið happ fyrir handboltann í Stjörnunni að hafa Siggeir í sínum röðum.

 

  • Auður Íris Ólafsdóttir, körfuboltaþjálfari Stjörnunni

 

Mikill uppgangur hefur verið í kvennakörfunni hjá Stjörnunni og á síðasta ári unnust fjölmargir titlar hjá yngri flokkum félagsins. Auður stýrði stúlknaflokki til úrslita í bikarkeppni ásamt því að vera hluti af þjálfarateymi 9. og 10. flokks sem unnu þrjá titla á síðasta tímabili. Hún er þjálfari meistaraflokks kvenna og hefur hún leitt uppbyggingu flokksins hjá Stjörnunni sem nú um mundir sitja einar taplausar á toppi 1. deildarinnar.
Ásamt því að þjálfa meistaraflokk þjálfar Auður 9., 10. og 11. flokk kvenna og eru öll þau lið í toppbaráttu í sínum flokki. 10. fl. stelpurnar hafa nú unnið sér inn þátttökurétt í bikarúrslitunum og gætu fleiri bæst í hópinn. Auður er einn efnilegasti þjálfari landsins. Hún er góð fyrirmynd fyrir aðra þjálfara félagsins.