Ítrekuð skemmdarverk á strætóskýlum í Garðabæ
Í annað sinn á 3 mánuðum hafa rúður verið brotnar í nýjum strætóskýlum bæjarins við Bæjarbraut
-
Skemmdarverk á strætóskýli
Í vor voru sett upp ný strætóskýli í Garðabæ, meðal annars við Bæjarbraut, til móts við Pizzuna öðru megin og við Fjölbrautaskólann hinum megin. Nú hafa rúður verið brotnar í skýlunum í annað sinn á þeim þremur mánuðum sem þau hafa staðið. Þessum skemmdarverkum fylgja mikill óþrifnaður og hætta vegna glerbrota sem dreifast um allt sem og mikill kostnaður fyrir bæjarfélagið í því að endurnýja öryggisglerin og vinnu við það. Bæjarbúar eru beðnir um að fylgjast með og láta lögreglu vita ef þeir taka eftir skemmdarvörgum á ferð.
