Lokahátíð Stóru upplestrarkeppninnar
Lokahátíð Stóru upplestrarkeppninnar var haldin í Kirkjuhvoli, safnaðarheimili Vídalínskirkju, fimmtudaginn 28. maí sl. Nemendur úr sjöunda bekk í grunnskólum Garðabæjar tóku þátt í lokahátíðinni
-
Baldur Ómar Jónsson úr Flataskóla (3. sæti), Ísold Sævarsdóttir úr Flataskóla (2. sæti) og Emma Lóa Eiríksdóttir úr Sjálandsskóla (1. sæti).
Lokahátíð Stóru upplestrarkeppninnar var haldin í Kirkjuhvoli, safnaðarheimili Vídalínskirkju, fimmtudaginn 28. maí sl. Nemendur úr sjöunda bekk í grunnskólum Garðabæjar tóku þátt í lokahátíðinni sem átti upphaflega að fara fram í mars en var slegið á frest þá þar til núna vegna fjöldatakmarkana sem voru í gildi.
Á lokahátíðinni fengu nemendur í sjöunda bekk úr Álftanesskóla, Flataskóla, Hofsstaðaskóla og Sjálandsskóla að spreyta sig á upplestri á fyrirfram ákveðnum texta úr skáldsögum og ljóðum. Tveir nemendur frá hverjum grunnskóla stigu á stokk með vandaðan upplestur fyrir hönd síns skóla og fluttu texta og ljóð eftir skáld keppninnar. Skáld keppninnar í ár voru þeir Jón Jónsson úr Vör og Birkir Blær Ingólfsson. Einnig fengu nemendur að lesa ljóð að eigin vali. Á meðan á hátíðinni stóð var einnig boðið upp skemmtiatriði frá skólunum og í ár voru flutt glæsileg tónlistaratriði þar sem m.a. var spilað á fiðlu, píanó og saxófón.
Viðurkenningar á lokahátíðinni
Í lok hátíðar afhenti Eiríkur Björn Björgvinsson, forstöðumaður fræðslu- og menningarsviðs Garðabæjar, öllum lesurunum bók frá Félagi íslenskra bókaútgefenda sem viðurkenningu fyrir þátttökuna. Varamenn sem tóku fullan þátt í undirbúningnum fengu einnig bókaverðlaun frá Garðabæ. Dómnefnd sem var að störfum fékk það erfiða val að velja þrjá lesara úr hópnum og veita þeim viðurkennningar og verðlaun fyrir 1.-3. sæti.
Í fyrsta sæti í ár var Emma Lóa Eiríksdóttir úr Sjálandsskóla, í öðru sæti var Ísold Sævarsdóttir úr Flataskóla og í þriðja sæti var Baldur Ómar Jónsson úr Flataskóla.
Um Stóru upplestrarkeppnina
Stóra upplestrarkeppnin hófst sem tilraunaverkefni um upplestur veturinn 1996-1997. Hefur keppnin eflst og stækkað með hverju árinu og fjölmargir skólar um allt land taka þátt.
Garðabær hefur tekið þátt í keppninni nánast frá upphafi eða í 23 ár en Álftanesskóli hefur verið með frá byrjun eða í 24 ár. Lokahátíðir Stóru upplestrarkeppninnar eru venjulega haldnar um land allt í mars mánuði en undirbúningur hefst formlega á degi íslenskrar tungu þann 16. nóvember ár hvert og nemendur læra að leggja rækt við góðan upplestur. Hátíðarhlutinn er það sem kalla mætti hina eiginlegu „keppni“. Haldin er upplestrarhátíð í hverjum skóla í lok febrúar eða byrjun mars þar sem tveir nemendur eru valdir til áframhaldandi þátttöku í keppninni fyrir hönd skólans. Stóru upplestrarkeppninni lauk svo formlega með lokahátíðinni sem að þessu sinni var haldin í lok maí.