11. jan. 2026

Lucie og Jón Þór eru íþróttafólk ársins 2025 í Garðabæ

Íþróttakona ársins 2025 í Garðabæ er Lucie Martinsdóttir Stefaniková, kraftlyftingakona. Íþróttakarl ársins 2025 í Garðabæ er Jón Þór Sigurðsson, skotíþróttamaður. Tilkynnt var um valið á íþróttafólki ársins við hátíðlega athöfn á íþróttahátíð Garðabæjar sem fór fram í Ásgarði.

Á hátíðinni voru einnig veittar viðurkenningar til þjálfara ársins og liðs ársins. Auk þess voru viðurkenningar veittar fyrir að keppa í fyrsta skipti með A-landsliði, fyrir að keppa í fyrsta skipti með unglingalandsliði, fyrir frammistöðu á erlendum vettvangi og fyrir framlag til félagsmála í Garðabæ. Öllum fyrrverandi íþróttamönnum Garðabæjar var boðið sérstaklega á hátíðina í ár.

Hér fyrir neðan má lesa umsagnir um íþróttafólk ársins 2025 í Garðabæ.

Jón Þór Sigurðsson er íþróttakarl ársins 2025 í Garðabæ

Jón Þór tók fyrsta sæti í flestum kúlugreinum skotfimi á Íslandi á árinu bæði með riffli og að auki með ýmsum gerðum skammbyssu. Hann varð Evrópumeistari og setti nýtt Íslandsmet í 300 metra liggjandi riffli. Þá kom hann með brons heim af HM í sömu grein. Hann tók gull á Smáþjóðaleikunum í Andorra með loftskammbyssu og gull á Evrópubikarmóti í 300 metra liggjandi riffli. Þetta er einstakur árangur Íslendings á alþjóðavettvangi í íþróttum. Á EM í Chateauroux Frakklandi 1. ágúst bætti Jón Þór eigið Íslandsmet og þá sigraði á Evrópubikarmótinu í Sviss á árinu. Stórbrotinn árangur hjá Jóni Þór.

^{Jón Þór gat ekki verið viðstaddur athöfnina en þær Ingunn Guðbrandsdóttir, Embla og Edda tóku við viðurkenningunni fyrir hans hönd. Hér eru þær Ingunn og Embla ásamt Hrannari Braga Eyjólfssyni, formanni ÍTG, og Almari Guðmundssyni, bæjarstjóra Garðabæjar.}

Lucie Martinsdóttir Stefaniková er íþróttakona ársins 2025 í Garðabæ 

Lucie sem keppir í klassískum kraftlyftingum átti algjörlega frábært keppnisár. Hún náði í bronsverðlaun í samanlögðu í 76 kg flokki á EM á Malaga á Spáni í mars og hlaut einnig gullverðlaun í hnébeygju þar sem hún setti Evrópumet 211 kg. Samanlagt lyfti hún 563,5 kg á mótinu og náði þeim merka árangri að verða stigahæsti keppandi frá upphafi í klassískum kraftlyftingum innan íslenskra kraftlyftinga. Þá keppti Lucie á HM í klassískum kraftlyftingum í Chemnitz í Þýskalandi í júní í 84 kg flokki, en þar hlaut hún silfurverðlaun í hnébeygju með 220 kg. Hún lauk því árinu sem Evrópumeistari, Evrópumethafi og silfurverðlaunahafi á HM. Stórkostlegur árangur hjá Lucie.

Lið ársins 2025 – Meistaraflokkur karla í körfubolta hjá Stjörnunni

„Liðið skrifaði sig í sögubækur félagsins þegar það varð Íslandsmeistari í fyrsta sinn í sögu körfuknattleiksdeildar Stjörnunnar eftir eftirminnilegan sigur í oddaleik gegn Tindastóli. Heillastjarna skein yfir leið liðsins í úrslitakeppninni. Titillinn kom á 65 ára afmælisári Stjörnunnar og markaði tímamót í íþróttasögu Garðabæjar. Stjörnumenn bættu um betur með sigri í Meistarakeppni KKÍ í september og sýndu þar sem áður mikinn karakter, seiglu og liðsheild. Vegferð liðsins sameinaði samfélagið, efldi samtakamátt bæjarbúa og skapaði ógleymanlegar stundir þar sem Ásgarður var stappfullur og bæjar- og félagsandinn í forgrunni,“ segir í umsögninni um lið ársins.

Þjálfarar ársins 2025 – Þjálfarateymi meistaraflokka fimleikadeildar Stjörnunnar

„Teymið samanstóð af stökkþjálfurunum Unu Brá Jónsdóttur, Kristni Má Hjaltasyni og Jimmy Erik Ekstedt, ásamt dansþjálfurunum Andreu Sif Pétursdóttur og Tönju Kristínu Leifsdóttur, sem báru sameiginlega ábyrgð á þjálfun, undirbúningi og framvindu iðkenda. Undir þeirra stjórn náði Stjarnan framúrskarandi árangri, varð bæði bikar- og Íslandsmeistari í hópfimleikum og hafnaði í öðru sæti á Norðurlandamóti. Starfið einkenndist af fagmennsku, skýrri verkaskiptingu og heildrænni nálgun, þar sem gleði, traust og sterk liðsheild voru í forgrunni. Með samstilltu átaki og metnaði hefur teymið skapað fyrirmyndarstarf innan íslenskrar fimleikahreyfingar,“ segir í umsögn um þjálfarateymið.

Einnig voru viðurkenningar veittar fyrir að keppa í fyrsta skipti með A-landsliði, fyrir að keppa í fyrsta skipti með unglingalandsliði, fyrir frammistöðu á erlendum vettvangi og fyrir framlag til félagsmála í Garðabæ.

Heiðursviðurkenning fyrir framlag til félagsmála í Garðabæ

Veittar voru heiðursviðurkenningu fyrir framlag til félagsmála í Garðabæ. Þau Friðþjófur Thorsteinsson Ruiz, Agnar Jón Ágústsson, Helgi Hrannarr Jónsson og Sigrún Þorsteinsdóttir hlutu heiðursviðurkenningu fyrir óeigingjarnt og metnaðarfullt starf sem nýst hefur í þágu bæjarfélagsins.