Lýðheilsugöngur í september
Garðabær tekur þátt í verkefni Ferðafélags Íslands um lýðheilsugöngur í september. Alla miðvikudaga getur almenningur tekið þátt í lýðheilsugöngum um allt land. Þetta er annað árið í röð sem blásið er til þessa átaks en göngurnar eru um leið áframhald vinsælla sögu- og fræðslugangna Garðabæjar sem hafa verið farnar á undanförnum árum.
-
Frá lýðheilsugöngu 2017
Garðabær tekur þátt í verkefni Ferðafélags Íslands um lýðheilsugöngur í september. Alla miðvikudaga getur almenningur tekið þátt í lýðheilsugöngum um allt land. Þetta er annað árið í röð sem blásið er til þessa átaks en göngurnar eru um leið áframhald vinsælla sögu- og fræðslugangna Garðabæjar sem hafa verið farnar á undanförnum árum.
Göngurnar hefjast kl. 18:00 alla miðvikudaga vítt og breitt um landið og er fyrsta gangan miðvikudaginn 5. september. Um er að ræða fjölskylduvænar göngur sem eru uþb 60-90 mínútur að lengd. Tilgangurinn með verkefninu er að hvetja fólk á öllum aldri til útivistar og hreyfingar í góðum félagsskap og efla þar með heilsu sína og lífsgæði.
Taktu með þér vin í göngu miðvikudaginn 5. september
Boðið verður upp á göngur í Garðabæ miðvikudagana 5., 12., 19. og 26. september. Vinátta er þema fyrstu göngunnar sem verður farin frá Sjálandsskóla við Löngulínu miðvikudaginn 5. september kl. 18. Svandís Ríkharðsdóttir íþróttakennari leiðir göngufólk í hressingargöngu meðfram strandlengjunni og göngumenn fá tækifæri til að prófa nýja hreystigarðinn við Arnarnesvog.
Miðvikudaginn 12. september verður haldið í hressingargöngu frá íþróttamiðstöðinni Ásgarði og m.a. staldrað við hjá nýjum hreystigarði við Sunnuflöt. Miðvikudaginn 19. september verður gengið í Heiðmörkinni frá nýju bílastæði við Búrfellsgjá/Selgjá. Síðasta gangan verður 26. september en þá verður gengið frá Bessastöðum að Skansinum.
Góður félagsskapur
Garðbæingar eru hvattir til að taka þátt í göngunum þar sem boðið verður upp á fróðleik, auðvelda hreyfingu og umfram allt góðan félagsskap göngumanna.