Garðaskóli fær góðan stuðning
Garðaskóla hefur borist góður stuðningur úr ýmsum áttum fyrir komandi skólaár. Í ágúst tölublaði fréttabréfs skólans sem aðgengilegt er á vef hans segir Ragnar Gíslason skólastjóri m.a. frá því að skólinn hafi fengið fjárveitingu til að halda "Gagn og gaman daga" í lok október en þeir féllu niður í fyrra vegna hagræðingar. Forvarnanefnd bæjarins hafi einnig styrkt skólann myndarlega við forvarnaverkefnin Marita og Blátt áfram.
Ragnar greinir frá því að skólinn hafi nýlega fengið, frá félags- og tryggingmálaráðuneytinu, hæsta styrk sem honum hefur hlotist, kr. 2.420.000 til að starfrækja deild fyrir nemendur með ADHD í vetur.
Þá nefnir hann að tvö félagasamtök, þ.e. Soroptimistaklúbbur Hafnarfjarðar og Garðabæjar og Kvenfélag Garðabæjar styrktu skólann til kaupa á náttúrufræðiforritinu "Sunflower" sem mun nýtast öllum nemendum skólans Skólinn hlaut einnig styrk frá Vonarsjóði Kennarasambands Íslands til að halda úti verkefni um heimspeki og samræðulist og Viðskiptaráð Íslands veitti skólanum á sl. vetri stuðning til að veita fjórum nemendum í alþjóðadeild skólans þjónustu.
Að lokum kemur fram að skólinn fékk enn á ný styrk til tveggja ára til að halda úti alþjóðlegu samvinnuverkefni Evrópuþjóða kennt við Comenius en ein afurð þess samstarfs er í formi matreiðslubókar með uppskriftum frá löndunum sjö sem taka þátt í verkefninu, sem kom út í haust.
Fréttabréf Garðaskóla ágúst 2010.