Fjáröflunarbingó í Hofsstaðaskóla
Fullt var út úr dyrum á fjáröflunarbingói foreldrafélags Hofsstaðaskóla sem haldið var í síðustu viku, þar sem safnað var fyrir gagnvirkum skólatöflum. Þrjár slíkar töflur eru nú notaðar við kennslu í skólanum með góðum árangri.
Rúmlega 500 manns mættu á bingóið sem þótti einkar vel heppnað. Fjöldi spennandi vinninga var í boði, en mörg fyrirtæki í Garðabæ og utan bæjarmarkanna lögðu verkefninu lið með því að gefa vinninga.
Mikill metnaður foreldra
“Það kom okkur skemmtilega á óvart hversu margir foreldrar og nemendur sýndu stuðning sinn í verki,” segir Sigríður Guðlaugsdóttir í tækjanefnd foreldrafélagsins. “Það segir okkur að foreldrar hafi metnað fyrir því að börnin þeirra njóti tækjabúnaðar sem auki námsárangur þeirra og áhuga á námsefninu.”
Skólinn hafi áformað að kaupa eina töflu í hverja bekkjarstofu. Eftir hrunið hafi þau áform breyst og þess vegna hafi foreldrafélagið ákveðið að leggja sitt af mörkum; “Við viljum ná upphaflegu markmiði skólans um eina töflu í hverja bekkjarstofu. Hvort það tekst á fimm árum eða tíu verður að koma í ljós,” segir Sigríður.
Þetta er annað átakið sem foreldrafélagið stendur fyrir vegna söfnunarinnar, en fyrir jól voru gefin út jólakort sem Hilmar Snær Örvarsson, einn nemandi skólans, hannaði. Á vormánuðum stefnir tækjanefndin að því að halda markað sem verður auglýstur nánar síðar.
Á vef Hofsstaðaskóla eru fleiri myndir frá bingóinu og reikningsnúmer fyrir þá sem vilja leggja söfnuninni lið.