Heimsókn menntamálaráðherra
Katrín Jakobsdóttir menntamálaráðherra heimsótti Sjálandsskóla í vikunni og opnaði um leið nýjan vef um loftslagsbreytingar á jörðinni. Oddný og Styrkár nemendur í 9. bekk tóku á móti ráðherra og gengu með hana um skólann að unglingadeildinni þar sem nemendur í 8.-9. bekk tóku á móti gestunum.
Vefsíðan sem var opnuð er hluti af verkefni Námsgagnastofnunar sem einnig gefur út nýja kennslubók/þemahefti og fræðslumynd um loftslagsbreytingar.
Þemaheftið CO ₂ – framtíðin í okkar höndum, sem Einar Sveinbjörnsson veðurfræðingur hefur tekið saman, fjallar um breytingar á loftslagi á jörðinni. Heftið er væntanlegt í janúar. Fræðslumyndin Gróðurhúsaáhrif – loftslagsbreytingar og hlýnun jarðar, fjallar um veðurfarsbreytingar sem hafa orðið á jörðinni, m.a. með rannsóknum á Suðurskautslandinu.
Á vefsíðunni CO ₂ – framtíðin í okkar höndum, verða meðal annars kennsluleiðbeiningar sem Helgi Grímsson skólastjóri Sjálandsskóla tók saman, krækjur og myndefni, auk verkefna sem hægt er að vinna í tengslum við efni fræðslumyndarinnar.
Á heimasíðu Sjálandsskóla má sjá fleiri myndir frá heimsókn Menntamálaráðherra 11. nóvember sl.