Blómlegt æskulýðsstarf
Garðabær og Garðasókn hafa gert með sér þjónustusamning um framkvæmd æskulýðsstarfs á vegum Æskulýðsfélags Garðasóknar. Samningurinn gildir frá byrjun árs 2009 fram til 31. desember 2009. Gunnar Einarsson bæjarstjóri Garðabæjar og Magnús E. Kristjánsson formaður sóknarnefndar undirrituðu samninginn á bæjarskrifstofum Garðabæjar fimmtudaginn 2. júlí.
Á myndinni hér til hliðar, frá vinstri eru : Ragnhildur Inga Guðbjartsdóttir formaður íþrótta- og tómstundaráðs, Gunnar Einarsson bæjarstjóri, Magnús E. Kristjánsson formaður sóknarnefndar og Halldór Magnússon framkvæmdastjóri Garðasóknar.
Fjölbreytt barna- og unglingastarf
Hlutverk Æskulýðsfélags Garðasóknar er m.a. að efla barna- og unglingastarf við kirkjuna og að efla tengsl við annað íþrótta-, tómstunda og forvarnarstarf í Garðabæ. Æskulýðsfélagið hefur einnig annast fræðsluverkefni fyrir börn og ungmenni með áherslu á mannréttindi, hjálparstarf, lífsleikni og almennt siðfræði.
Undanfarin ár hefur æskulýðsstarf Vídalínskirkju eflst og dafnað og eru bæði yngri og eldri æskulýðsfélög ásamt hljómsveitum starfrækt í kirkjunni. Einnig hefur samstarfið við leikskóla og félög í bænum styrkst og vel hefur tekist til með Gospelkórs Jóns Vídalíns sem er samstarfsverkefni við Fjölbrautaskólann í Garðabæ.
Æskulýðs- og forvarnarfulltrúi kirkjunnar
Æskulýðs- og forvarnarfulltrúi Vídalínskirkju, Ármann H. Gunnarsson, hefur haft meginumsjón með æskulýðsstarfinu ásamt öðru starfsfólki sóknarinnar. Nýr æskulýðsfulltrúi tekur til starfa í haust þegar Ármann heldur til hjálparstarfa erlendis. Á heimasíðu Garðasóknar, www.gardasokn.is, er hægt að finna margvíslegan fróðleik um æskulýðsstarfið.