Blár apríl í leikskólanum Sjálandi
Blár apríl er vitundarvakning um einhverfu. Hér á Íslandi er það Styrktarfélag barna með einhverfu sem stendur fyrir Bláum apríl og í ár er safnað fyrir námskeiðum fyrir foreldra barna með einhverfu sem og félagsfærninámskeiðum fyrir börn með einhverfu. Blár er alþjóðlegur litur einhverfu og í dag föstudaginn 10. apríl tóku margir leik- og grunnskólar þátt í átakinu með því að hvetja nemendur og starfsmenn til að mæta í bláum fatnaði.
Í leikskólanum Sjálandi tóku börn og kennarar þátt í bláa deginum í dag og mættu bláklædd í skólann. Leikskólinn Sjáland leggur mikla áherslu á að mæta öllum börnum þar sem þau eru stödd og unnið er mjög markvisst með börnum með sérþarfir. Í leikskólanum eru 8 börn með greiningu á einhverfurófinu sem eru í atferlisþjálfun. Í skólanum er 15 manna þjálfunarteymi sem vinnur að þessari þjálfun með það markmið að börn með sérþarfir fái notið sín í skólastarfinu.