Jólastund fyrir grunnskólanemendur í Tónlistarskóla Garðabæjar
Þriðjudaginn 12. desember var öllum grunnskólanemendum í 2. og 3. bekk í Garðabæ boðið á notalega jólastund í tónleikasal Tónlistarskóla Garðabæjar að Kirkjulundi. Nokkrir nemendur tónlistarskólans spiluðu jólalög á saxófón, klarínett, þverflautur, túbu, básúnu, trompet, franskt horn og harmónikku og með þeim spilaði hljómsveit hússins sem samanstóð af píanóleikara, trommuleikara og bassaleikara.
Um 600 börn komu í heimsókn í Tónlistarskóla Garðabæjar þennan dag og starfsfólk Tónlistarskólans þakkar öllum börnum sem komu í heimsókn fyrir komuna.
Saxófónhópur Tónlistarskóla Garðabæjar spilar á jólatónleikum í Hörpu
Eins og kom fram í frétt hér á vef Garðabæjar í síðustu viku þá koma nemendur í Tónlistarskóla Garðabæjar víða við í desember. Nú um helgina spilar saxófónhópur úr skólanum á fernum jólatónleikum Sinfoníuhljómsveitar Íslands. Hópurinn samanstendur af 10 nemendum skólans á aldrinum 11 - 22 ára, undir stjórn Braga Vilhjálmssonar. Tónleikarnir eru 16. og 17. desember í Eldborgarsal Hörpu.