Fyrsta ungmennaþing Garðabæjar fór vel fram
Ungmennaráð Garðabæjar stóð fyrir fyrsta ungmennaþingi bæjarins miðvikudaginn 8. nóvember í sal Tónlistarskólans.
Fyrsta ungmennaþing Garðabæjar var haldið miðvikudaginn 8. nóvember sl. í sal Tónlistarskóla Garðabæjar í Kirkjulundi, á vegum ungmennaráðs Garðabæjar. Ungmennum á aldrinum 14-20 ára var boðið að taka þátt í þinginu.
Gunnar Einarson bæjarstjóri setti þingið og Birta Hjaltadóttir, formaður ungmennaráðs, kynnti ráðið og þingið fyrir ungmennum. Margar áhugaverðar hugmyndir komu fram og spunnust umræður í kjölfar þeirra. Ungmennaráð Garðabæjar mun fara yfir allar ábendingar og hugmyndir sem fram komu og koma þeim áleiðis í nefndir og ráð bæjarins. Í lok þingsins komu JóiPé og Króli, tóku fjölmörg lög og spjölluðu við hópinn. Enginn fór svangur heim því gómsætar pizzur voru í boði fyrir mannskapinn.
Dæmi um ábendingar og tillögur sem fram komu:
• Meira símat í skólum en jafnframt undirbúningur fyrir krefjandi framhaldsskólanám.
• Aukin áhersla á vímuefnafræðslu fyrir 10. bekk.
• Hafa félag þar sem unga fólkið má stjórna í tómstundarstarfi sem það hefur áhuga á.
• Vantar mínigolf í Garðabæ.
• Vantar aðstöðu fyrir framhaldsskólanemendur til að læra undir lokapróf, t.d. kaffihús eða lesstofur.
• Gefa ungmönnum með ADHD tölvur.
• Kaffihús með þæginlegri stemningu.
• Setja viðvörunarmerki vegna fugla á leiðinni á Álftanesið.
• Grænar tunnur í Garðabæ.
• Skólastrætó sem skutlar nemendum heim eftir skóla.
• Ungmennahús sem ungmenni geta lært í og verið saman þar.
Ungmennaráð þakkar öllum þeim sem komu á þingið fyrir komuna og skemmtilega samveru.