Þorgerður Anna Arnardóttir ráðin í starf skólastjóra Urriðaholtsskóla
Þorgerður Anna Arnardóttir hefur verið ráðin í starf skólastjóra Urriðaholtsskóla. Urriðaholtsskóli er nýr samrekinn leik- og grunnskóli í Garðabæ fyrir nemendur á aldrinum 1-16 ára. Skólinn verður tekinn í notkun í áföngum. Leikskóladeild mun taka til starfa í ársbyrjun 2018.
-
Þorgerður Anna Arnardóttir,skólastjóri Urriðaholtsskóla
Þorgerður Anna Arnardóttir hefur verið ráðin í starf skólastjóra Urriðaholtsskóla.
Þorgerður Anna var skólastjóri Barnaskóla Hjallastefnunnar til margra ára og þar stýrði hún bæði leikskóladeild og grunnskóla. Hún hefur einnig tekið að sér að stýra leikskóla á Skagaströnd ásamt því að stýra ýmsum starfsmannamálum Hjallastefnunnar. Hún hefur m.a. stýrt innleiðingu nýrra starfshátta í skólaumhverfi Hjallastefnunnar og unnið að margskonar þróunarverkefnum og leitt skólastarf af mikilli framsýni. Þorgerður Anna hefur reynslu af uppbyggingu á nýjum skóla og þróun hans. Hún hefur verið farsæl í starfi bæði sem kennari og stjórnandi
Þorgerður Anna er með B.ed í grunnskólafræðum, hún hefur leyfisbréf á leik- og grunnskólastigi. Þorgerður Anna er með diploma í Stjórnun menntastofnana frá Háskóla Íslands og er í námi til mastersprófs við sama skóla.
Sjö umsóknir bárust um starf skólastjóra Urriðaholtsskóla.
Urriðaholtsskóli er nýr samrekinn leik- og grunnskóli í Garðabæ fyrir nemendur á aldrinum 1-16 ára. Skólinn verður tekinn í notkun í áföngum. Leikskóladeild mun taka til starfa í ársbyrjun 2018. Um haustið 2018 bætist við 1.-4. bekkur grunnskóla sem mun vaxa með skólanum. Í skólanum fullbyggðum verður félagsmiðstöð, bókasafn, tónlistarskóli ásamt íþróttamannvirkjum og sundlaug.