Haustgróðursetningar grunnskólanemenda
Í september hafa nemendur 4. bekk úr Álftanesskóla og Hofsstaðaskóla gróðursett birkiplöntur í landi Bessastaða. Plönturnar fá skólarnir úthlutað úr Yrkjusjóði sem frú Vigdís Finnbogadóttir fyrrum forseti stofnaði. Gróðursett var í móa norðan við gróðurreit frá tíð Ásgeirs Ásgeirssonar fyrrum forseta.
Á vef Hofsstaðaskóla má sjá frétt og myndir þegar nemendur hjóluðu alla leið að Bessastöðum og tilbaka.
Einnig mættu nemendur Sjálandsskóla og Alþjóðaskólans í skógræktarsvæðið í Sandahlíð ofan Kjóavalla til að gróðursetja yrkjuplöntur. Hvert barn gróðursetti um tvær plöntur og fræddist í leiðinni um gróður og naut útiverunnar í góða haustveðrinu.
Yrkjuverkefnið er í umsjón Skógræktarfélags Garðabæjar sem útvegaði svæði til gróðursetninga og leiðbeindi nemendum og kennurum við gróðursetningarnar.