1. sep. 2017

Lýðheilsugöngur í september

Garðabær tekur þátt í verkefni Ferðafélags Íslands um lýðheilsugöngur í september.  Alla miðvikudaga í september getur almenningur tekið þátt í lýðheilsugöngum um allt land.  Göngurnar eru hluti af afmælisdagskrá FÍ en félagið fagnar 90 ára afmæli á árinu. Göngurnar hefjast kl. 18:00 alla miðvikudaga vítt og breitt um landið og er fyrsta gangan 6. september. Um er að ræða fjölskylduvænar göngur sem taka  u.þ.b. 60-90 mín. Tilgangurinn með verkefninu er að hvetja fólk á öllum aldri til útivistar og hreyfingar í góðum félagsskap og efla þar með heilsu sína og lífsgæði. 

Göngur í Garðabæ

Boðið verður upp á göngur miðvikudagana 6., 13., 20. og 27. september kl. 18:00. Göngurnar eru um leið áframhald sögu- og fræðslugangna sem hafa verið í boði á þessu ári og undanförnu ári í Garðabæ og hafa verið vel sóttar af almenningi.  Göngurnar verða kynntar í viðburðadagatali hér á vefnum og á fésbókarsíðu bæjarins.   

Garðbæingar eru hvattir til að taka þátt í göngunum þar sem boðið verður upp á fróðleik, auðvelda hreyfingu og umfram allt góðan félagsskap göngumanna.  

Hressingarganga miðvikudaginn 6. september kl. 18:00 - þema Vellíðan

Vellíðan er þema fyrstu göngunnar þar sem farið verður í hressingargöngu frá íþróttamiðstöðinni í Sjálandsskóla meðfram strandlengjunni við Arnarnesvog miðvikudaginn 6. september kl. 18:00. Létt og þægileg ganga til að auka á vellíðan í upphafi hausts. Göngustjórar verða þau Anton Kári og Hildur Katla, BS nemar í íþróttafræði á 3ja ári. 

Miðvikudaginn 13. september kl. 18 verður farið í göngu undir þemanu vinátta og gengið frá Ásgarði. 
Miðvikudaginn 20. september kl. 18 verður farið í göngu undir þemanu saga.  Pétur Ármansson leiðir þá göngu frá Bjarnastöðum þar sem sagt verður frá sögu merkra húsa á Álftanesi. 
Miðvikudaginn 27. september kl. 18 verður haldið í göngu undir þemanu náttúra í Heiðmörk þar sem gengið verður að Selholti undir leiðsögn Ragnheiðar Traustadóttur fornleifafræðings.

Allar upplýsingar um göngustaði og gönguleiðir annars staðar á landinu má finna á vef verkefnisins www.fi.is/lydheilsa. Þar gefst almenningi einnig kostur á að skrá sig í lukkupott sem dregið verður úr í október og geta heppnir göngugarpar hreppt glæsilega vinninga.