Upplýsingar um loftmengun
Á undanförnum vikum hefur loftmengandi gasefnið brennisteinsdíoxíð SO2 borist frá eldstöð í Holuhrauni norðan Vatnajökuls til íbúa í mörgum sveitarfélögum. Undanfarna sólarhringa hefur borið á loftmengun á höfuðborgarsvæðinu vegna þessa.
Loftgæðamælingar á vef Umhverfisstofnunar
Umhverfisstofnun fylgist með loftgæðum á nokkrum stöðum í landinu og á vef stofnunarinnar er hægt að skoða mælingarnar og velja þar loftgæðamælistöð næst viðkomandi stað. Mælistöðvar næst Garðabæ eru í Kópavogi og Hafnarfirði og hægt að velja þær mælistöðvar hér á vef Umhverfisstofnunar: http://www.ust.is/einstaklingar/loftgaedi/maelingar Athugið að velja brennisteinsdíoxíð (SO2) ef fleiri mengunarefni er mæld í stöðinni.
Vefur Veðurstofunnar
Einnig eru gagnlegar upplýsingar fyrir íbúa á vef Veðurstofunnar og þar er hægt að fylgjast með dreifingu loftmengunar og fylgjast með fram eftir degi ef ástæða er til: http://www.vedur.is/vedur/spar/textaspar/oskufok/. Ef rennt er niður síðuna og smellt á „nýjustu keyrslu“ má fá mat á dreifingu loftmengunar u.þ.b. sólarhring fram í tímann.
Jafnframt hafa helstu fréttamiðlar landsins birt reglulega fréttir um hvar loftmengun er helst hverju sinni. Fari styrkur brennisteinsdíoxíðs yfir 600, er fólki ráðlagt að forðast áreynslu utandyra.
Á vef Sambands íslenskra sveitarfélaga hafa jafnframt verið teknar saman leiðbeiningar um brennisteinsdíóxíð í andrúmslofti.