Garðabær mætir Kópavogi í 16 liða úrslitum Útsvars
Spurningaþátturinn Útsvar er nú tíunda veturinn á föstudagskvöldum í sjónvarpinu. Eins og síðastliðin ár eru það sveitarfélög alls staðar af landinu sem etja kappi í sjónvarpssal RÚV. Umsjónarmenn þáttarins eru Sigmar Guðmundsson og Þóra Arnórsdóttir.
Garðabær keppti í fyrstu umferð 25. nóvember sl. og hafði þá betur gegn liði Hornafjarðar. Í liði Garðabæjar í ár eru þau Aldís Hilmarsdóttir, Huginn Freyr Þorsteinsson og Steinn Hildar Þorsteinsson. Með sigri í fyrstu umferð komst liðið áfram í 16 liða úrslit og nú er komið að Garðabæ að keppa á ný í annarri umferð föstudagskvöldið 3. febrúar nk. kl. 20:15 gegn nágrönnum okkar í Kópavogi.
Áhorfendur eru velkomnir að fylgjast með viðureigninni í beinni útsendingu úr sjónvarpssal í Efstaleiti. Mæting er um hálftíma fyrir útsendingu. Einnig verður sýnt beint frá viðureigninni í sjónvarpi í Bókasafni Garðabæjar á Garðatorgi á Safnanótt föstudaginn 3. febrúar nk.
Upplýsingar um spurningaþáttinn Útsvar á vef sjónvarpsins.
Áfram Garðabær!