Vel heppnað landsmót íslenskra skólalúðrasveita
Helgina 29. apríl til 1. maí sl. var Landsmót íslenskra skólalúðrasveita haldið í Garðabæ. Um 700 þátttakendur tóku þátt úr 20 hljómsveitum sem komu víðs vegar af landinu. Mikil æfingadagskrá fór fram þá helgi þar sem þátttakendum var getuskipt í um það bil 100 barna hljómsveitir auk þess sem skipuð var sérstök trommusveit. Æfingar fóru fram í tveimur sölum í íþróttamiðstöðinni Ásgarði og einnig í Sjálandsskóla, Flataskóla, Skátaheimilinu við Bæjarbraut og í Tónlistarskóla Garðabæjar við Kirkjulund.
Milli æfinga var ýmislegt gert sér til skemmtunar, þátttakendur gátu farið í sundlaugina á Álftanesi, farið var í ratleik, Jón Víðis töframaður skemmti gestum og svo var haldin sérlega glæsileg kvöldskemmtun þar sem bræðurnir Jón Jónsson og Friðrik Dór komu fram og Diskótekið Dísa sá um stuðið frameftir kvöldi á laugardeginum.
Glæsilegir lokatónleikar
Landsmótinu lauk með hátíðar tónleikum sunnudaginn 1. maí í tveimur íþróttasölum í Ásgarði þar sem hljómsveitirnar komu fram og sýndu afrakstur æfingar helgarinnar. Skipuleggjendur landsmótsins voru afar ánægðir með hvernig til tókst á mótinu. Landsmótið var um leið lokapunktur Listadaga barna og ungmenna sem voru haldnir í Garðabæ síðustu dagana í apríl.
Á fésbókarsíðu SÍSL, samtaka íslenskra skólalúðrasveita, má sjá fleiri skemmtilegar myndir frá landsmótinu í Garðabæ.