Stjarnan fagnaði Íslandsmeistaratitli
Stjarnan varð Íslandsmeistari karla í knattspyrnu í fyrsta sinn þegar liðið lagði FH að velli á Kaplakrika laugardaginn 4. október sl. Um hreinan úrslitaleik var að ræða þegar liðin mættust en FH hefði dugað jafntefli til að vinna titilinn en Stjarnan hafði betur og leikurinn fór 2-1 Stjörnunni í vil. Leikurinn var æsispennandi og úrslitin réðust ekki fyrr en á uppbótartíma þegar Ólafur Karl Finsen skoraði síðara mark sitt í leiknum úr vítaspyrnu. Uppselt var á leikinn og um 6450 áhorfendur mættu til að fylgjast með. Mikil stemmning var á leiknum og ekki síður eftir leik þegar Garðbæingar fögnuðu Íslandsmeistaratitlinum. Góður endir á góðu sumri hjá Stjörnunni. Til hamingju Stjarnan!
Á vef Stjörnunnar vef Stjörnunnar er hægt að sjá margar skemmtilegar myndir frá úrslitaleiknum.