20. jún. 2014

Gaman í rigningunni á 17. júní

Margt var um að vera í Garðabæ á þjóðhátíðardaginn 17. júní sl. Hátíðardagskráin hófst að morgni til á Álftanesi þar sem var farið í skrúðgöngu að lokinni helgistund í safnaðarheimilinu að íþróttamiðstöðinni þar sem boðið var upp á skemmtidagskrá. Árlegt kaffihlaðborð Kvenfélags Álftaness var haldið síðar um daginn í íþróttamiðstöðinni. Einnig var boðið upp á hestaferðir fyrir framan Álftaneslaug, kanó og kajaksiglingar í Sjálandi og einnig gátu Garðbæingar notið þess að fara í sund í Álftaneslaug og veiða í Vífilsstaðavatni.

Í Vídalínskirkju var haldin árleg hátíðarstund og skrúðganga hélt þaðan niður að hátíðarsvæði við Garðaskóla þar sem skemmtidagskrá hófst um kl. 14. Fjölmörg skemmtiatriði voru í boði og þar á meðal var hljómsveitin Pollapönk og áhorfendur skemmtu sér vel þrátt fyrir rigningarveður. Kvenfélag Garðabæjar var með sitt árlega kaffihlaðborð í Flataskóla. Dagskráin að degi til var í umsjón skátafélagsins Vífils.

Um kvöldið voru hátíðartónleikar í safnaðarheimili Vídalínskirkju, Kirkjuhvoli. Þar steig hljómsveitin Salon Islandus á svið og fengu að þessu sinni til liðs við sig söngkonuna Hönnu Dóru Sturludóttur.  Dagskráin var létt og skemmtileg þar sem m.a. var flutt vínartónlist og áhorfendur hrifust með.