17. júní hátíðarhöld í Garðabæ
Fjölbreytt og skemmtileg dagskrá er í boði á 17. júní hátíðarhöldunum í Garðabæ nk. þriðjudag. Morgundagskráin fer fram víðs vegar um Garðabæ, m.a. verður 17. júnímót Golfklúbbs Álftaness, hestaferðir fyrir framan Álftaneslaug, kanó- og kajaksiglingar við ströndina í Sjálandi. Um daginn verður frítt í sund í Álftaneslaug og ókeypis veiði í Vífilsstaðavatni.
Hátíðardagskrá verður haldin við íþróttamiðstöð Álftaness kl. 10:30, skrúðgangan leggur af stað kl. 10:15 og kl. 10 verður helgistund í safnaðarheimilinu Brekkuskógum 1. Árlegt kaffihlaðborð Kvenfélags Álftaness er haldið í hátíðarsal íþróttamiðstöðvar Álftaness kl. 15-17.
Í Vídalínskirkju hefst hátíðarstund kl. 13.00 og skrúðganga leggur af stað að þessu sinni kl. 13:40 frá Vídalínskirkju að hátíðarsvæði við Garðaskóla þar sem verður fjölbreytt dagskrá frá kl. 14:30-16:30. Kaffihlaðborð Kvenfélags Garðabæjar er haldið í Flataskóla kl.14:30-17. Dagskráin að degi til er í umsjón Skátafélagsins Vífils.
Hátíðartónleikar að kvöldi
Um kvöldið verða haldnir hátíðartónleikar í safnaðarheimili Vídalínskirkju, Kirkjuhvoli, kl. 20.00. Þar stígur hljómsveitin Salon Islandus á svið ásamt Hönnu Dóru Sturludóttur sópransöngkonu. Þar verður flutt vínartónlist og boðið upp á létta og skemmtilega dagskrá við allra hæfi. Aðgangur að tónleikunum er ókeypis í boði Garðabæjar og allir velkomnir á meðan húsrúm leyfir.
Sjá nánari dagskrá hér á vefsíðu Garðabæjar.