Garðbæingar greiða áfram lægsta útsvarið
Á fundi bæjarstjórnar Garðabæjar fimmtudaginn 21. nóvember var samþykkt að hafa álagningarprósentu útsvars óbreytta eða 13,66% sem er sú lægsta á höfuðborgarsvæðinu.
Garðbæingar greiða því áfram lægsta útsvarið.
Þá hefur verið kynnt við umræðu um fjárhagsáætlun að þjónustugjöld í Garðabæ hækka ekki á árinu 2014. Í Garðabæ munu því leikskólagjöld, gjöld í tómstundaheimili, skólamatur, heimaþjónusta eldri borgara o.fl. verða óbreytt.
Garðabær leggur þannig sitt af mörkum til að koma á móts við kröfur í samfélaginu um að stilla álögum á fjölskyldur í hóf.
Fjárhagsáætlun Garðabæjar sem lögð hefur verið fram við fyrri umræðu ber vitni um sterka fjárhagsstöðu bæjarins, skuldir eru hóflegar og rekstrarniðurstaða jákvæð sem nemur 258 milljónum króna.