Gengið um Selgjá
Umhverfisnefnd bauð til fræðslugöngu um Selgjá í leiðsögn Ragnheiðar Traustadóttur fornleifafræðings sunnudaginn 21. október.
Góð þátttaka var í göngunni og voru göngumenn almennt ánægðir með hana og ekki síður fræðsluna.
Gengið var til suðurs yfir í hraunið frá bílaplaninu við Vífilsstaðahlíð að Þorsteinshelli (Sauðahellinum nyrðri) og þaðan í Selgjána sem er stórmerkilegur minjastaður. Í Selgjá eru friðlýstar fornleifar ellefu seljasamstæða sem telja má einstakar í sinni röð, byggðar upp við gjárbarmana með baðstofum, eldhúsi, kvíum og stekkjum. Þar var varla þverfótað fyrir margra alda gömlum tóftum sem skoðaðar voru í veðurblíðu.
Í lok göngunnar voru þátttakendur spurðir að því hvað þeir vildu skoða í næstu göngu. Ekki stóð á svari, það yrði Vífilsstaðasel.