Spilagleði á jazzhátíð
Jazzhátíð Garðabæjar hófst með skemmtilegum tónleikum Stórsveitar Samúels J. Samúelssonar í hátíðarsal FG fimmtudagskvöldið 17. maí sl. Um 200 manns mættu í FG til að hlusta á 17 frábæra tónlistarmenn sem léku fönkblandaðan jazz af miklum krafti fyrir áhorfendur. Í dag föstudag, verður boðið upp á jazz víðs vegar um Garðabæ. Hljómsveitin Reykjavík Swing Syndicate með Hauk Gröndal í fararbroddi heldur tónleika í Jónshúsi við Strikið 6 kl. 14 fyrir eldri borgara. Einnig verður swingað fyrir gesti og gangandi við Íslandsbanka á Garðatorgi kl. 15.30 og við verslunarkjarnann í Litlatúni kl. 17 í dag.
Ungmennatónleikar
Í kvöld, föstudag 18. maí kl. 20:30 verða ungmennatónleikar hátíðarinnar í safnaðarheimilinu Kirkjuhvoli. Þar koma fram Stórsveit og Smásveit Tónlistarskóla Garðabæjar undir stjórn þeirra Braga Vilhjálmssonar og handleiðslu Ómars Guðjónssonar. Einnig stígur á stokk hljómsveitin Ídúrogmoll sem er skipuðum ungum og efnilegum tónlistarmönnum, þeim Örnu Margréti Jónsdóttur, Eyrúnu Engilbertsdóttur, Aroni Erni Óskarssyni, Hjörvari Hans Bragasyni og Helga Kristjánssyni.
Hljómsveitin ADHD
Hátíðinni lýkur á laugardagskvöldinu 19. maí með tónleikum hljómsveitarinnar ADHD í safnaðarheimilinu Kirkjuhvoli. Fremst í fararbroddi eru bræðurnir Ómar og Óskar Guðjónssynir sem leika á gítar og saxófón. Ómar Guðjónsson var í fyrra útnefndur bæjarlistamaður Garðabæjar. Með þeim bræðrum leika Davíð Þór Jónsson á Hammond orgel og Magnús Tryggvason Elíassen á trommur. Hin vinsæla og marglofaða hljómsveit ADHD galdrar fram einstaka stemmningu á mörkum popp- og jazztónlistar.
Ókeypis aðgangur
Aðgangur er ókeypis á alla tónleika jazzhátíðarinnar og allir eru velkomnir á meðan húsrúm leyfir. Dagskráin er aðgengileg hér. Hátíðin er haldin á vegum menningar- og safnanefndar Garðabæjar og listrænn stjórnandi frá upphafi er Sigurður Flosason tónlistarmaður og fyrrum bæjarlistamaður Garðabæjar. Aðalstyrktaraðili hátíðarinnar er Íslandsbanki í Garðabæ. Jazzhátíðin hefur ávallt leitast við að bjóða upp á fjölbreytta dagskrá við allra hæfi með bestu jazztónlistarmönnum landsins sem margir hverjir eiga rætur sínar að rekja til Garðabæjar.