Tónlistarveisla framundan
Hin árlega Tónlistarveisla í skammdeginu á vegum menningar- og safnanefndar Garðabæjar verður haldin að kvöldi til fimmtudaginn 10. nóvember nk. í göngugötunni á Garðatorgi. Í tónlistarveislu ársins stígur Bubbi Morthens á svið með kassagítarinn sinn og skemmtir gestum og gangandi.
Þetta er í tíunda sinn sem tónlistarveislan er haldin á Garðatorgi og Garðbæingar sem og aðrir tónlistarunnendur hafa kunnað vel að meta og fjölmennt á torgið. Að venju verður reynt að skapa skemmtilega kaffihúsastemningu, borðum og stólum raðað upp á torginu og gestir geta keypt sér veitingar frá kl. 20.30. Tónleikarnir standa í rúma klukkustund án hlés frá kl. 21.
Sama kvöld verður einnig opið hús í sal Grósku á Garðatorgi þar sem gestir og gangandi geta skoðað myndlist frá kl. 19-23, allir velkomnir. Innangengt er í Gróskusalinn frá göngugötunni á Garðatorgi (gamla Betrunarhúsið). Auk þess eru listamenn með opnar vinnustofur og einnig eru ýmsar verslanir á torginu opnar þetta kvöld.
Sjá einnig upplýsingar um tónlistarveisluna hér í dagbókinni á heimasíðunni.