Ný gönguleið kynnt
Dagur íslenskrar náttúru er haldinn hátíðlegur í dag föstudaginn 16. september.
Í Garðabæ var haldið upp á daginn með því að efna til göngu frá Garðatorgi að húsi Náttúrufræðistofnunar Íslands í Urriðaholti. Gangan var á vegum umhverfisnefndar Garðabæjar í tilefni af opnun og kynningu á nýrri gönguleið frá Flatahverfi sem tengist upp í Urriðaholt og Heiðmörk með nýjum göngustíg í Garðahrauni. Erla Bil Bjarnardóttir garðyrkjustjóri var leiðsögumaður í göngunni sem endaði við Urriðaholtið kl. 11 þar sem vel var tekið á móti hópnum.
Daginn ber upp á fæðingardag Ómars Ragnarssonar. Sem frétta- og þáttagerðarmaður hefur hann verið óþreytandi við að opna augu almennings fyrir þeim auðæfum sem felast í náttúru landsins og mikilvægi þess að vernda hana og varðveita. Í tilefni dagsins er fjölbreytt dagskrá í boði víðs vegar um allt land.
Við hús Náttúrúfræðistofnunar Íslands í Urriðaholti var hátíðarsamkoma umhverfisráðherra þar sem fjölmiðlaverðlaun umhverfisráðuneytisins voru afhent. Verðlaunin hlaut Ragnar Axelsson ljósmyndari fyrir að beina sjónum að náttúrúvernd og samspili manns og náttúru í verkum sínum. Í hádeginu var boðið upp á göngu um Búrfellshraun og nágrenni.
Hamrahlíðarkórinn söng fyrir gesti í húsi Náttúrufræðistofnunar.
Afmælisbarnið Ómar Ragnarsson flutti erindi í tilefni dagsins.
Svandís Svavarsdóttir umhverfisráðherra afhenti sérstök fjölmiðlaverðlaun tileinkuð umfjöllun um íslenska náttúru.
Sjá nánari umfjöllun um Dag íslenskrar náttúru á vef Umhverfisráðuneytisins.