Gönguleið í Búrfellsgjá bætt
Fjölbreytt verkefni eru unnin af ungu fólki í sumarvinnu hjá Garðabæ. Unga fólkið er hluti af sérstökum skógræktarhópum sem starfa í landi Garðabæjar í sumar. Gefst þá tækifæri að skapa og endurnýja það sem er utan hefðbundinna verkefna garðyrkju. Töluvert hefur verið unnið í útivistarstígum ofan byggðar í sumar, eldri stígar lagfærðir t.d. í Vífilsstaðahlíð og unnið að nýjum stígum t.d. í Smalaholti.
Gönguleið í Búrfellsgjá
Gönguleiðin í Búrfellsgjá var í lélegu ástandi og þar hefur verið unnið að verulegum samgöngubótum. Timburstigi sem er niður um Hjallamisgengið var endurnýjaður. Þórir smiður garðyrkjudeildar Garðabæjar sá um smíði á nýja stiganum ásamt skógræktarhópi. Hópurinn er nú að lagfæra stíginn ofan Hjallamisgengis frá enda Vífilsstaðahlíðar og niður frá stiganum að Búrfellsgjá. Þessi stígur var orðinn úr sér genginn með grjót í yfirborði sem nú er hreinsað upp.
Nýi stiginn er rúmlega 6 m að lengd og tekur við af eldri stiga sem var orðinn gamall og fúinn.