Fjör í Álftaneslaug á Sundlauganótt
Laugardaginn 15. febrúar sl. var haldin Sundlauganótt víðs vegar á höfuðborgarsvæðinu. Garðabær tók í ár þátt í Sundlauganótt í fyrsta sinn og boðið var upp á dagskrá í Álftaneslaug. Álftaneslaugin var opin til miðnættis og góð aðsókn var í laugina um kvöldið. Fólk á öllum aldri kom við í fallegu vetrarveðri og hlýjaði sér í heitu pottunum. Boðið var upp á öldudiskó í sundlauginni og sundlaugin var lýst upp í tilefni kvöldsins. Öldusundlaugin var sett í gang og einnig var hægt að renna sér í vatnsrennibrautinni. Sundlaugin var þéttsetinn þegar Ingó Veðurguð mætti með gítarinn á sundlaugarbakkann og tók nokkur vel valin lög. Sundlaugargestir tóku vel undir hjá Ingó. Síðar um kvöldið var boðið upp á jóga í vatni og fljótandi gongslökun undir leiðsögn Arnbjargar Kristínar Konráðsdóttur jógakennara. Fjölmargir tóku þátt og flutu um og slökuðu á í innilauginni.
Myndlistarsýning í anddyrinu
Innandyra gátu gestir notið myndlistar og skoðað verk eftir myndlistarmenn úr Grósku, samtökum myndlistarmanna og áhugafólks um myndlist í Garðabæ. Verk eftir Gróskufélaga verða áfram til sýnis í íþróttamiðstöðinni á Álftanesi út febrúar. Sundlaugargestir voru mjög ánægðir með að fá að heimsækja laugina á laugardaginn og greinilegt að áhugi er fyrir því að hafa opið í sundlauginni á Sundlauganótt að ári.