Kammermúsík í Garðabæ
Menningar- og safnanefnd Garðabæjar stendur fyrir klassískri tónleikaröð haustið 2010 og vorið 2011 í Kirkjuhvoli, safnaðarheimili Vídalínskirkju í Garðabæ. Listrænn stjórnandi er píanóleikarinn Gerrit Schuil sem hefur fengið til liðs við sig úrvalslið tónlistarfólks.
Tónlistarmenn sem taka þátt í tónleikaröðinni á þessu ári eru Hallveig Rúnarsdóttir sópran og Auður Gunnarsdóttir sópran. Á næsta ári heldur tónleikaröðin áfram og þá stíga á svið Þóra Einarsdóttir sópran, Ágúst Ólafsson baritón og píanóleikarinn Martijn van den Hoek.
Tónleikar sunnudaginn 3. október
Fyrstu tónleikarnir verða haldnir sunnudaginn 3. október nk. kl. 16:00 í Kirkjuhvoli. Þá stíga á svið Hallveig Rúnarsdóttir sópran og Gerrit Schuil. Á tónleikunum verða flutt verk eftir Hugo Wolf úr ,,Mörike-Lieder” og ,,Les nuits d´été” eftir Hector Berlioz.
Miðasala fer fram á tónleikastað og almennt miðaverð er 1700 kr, miðaverð fyrir eldri borgara og námsmenn er 1200 kr.
Um tónlistarmennina
Hallveig Rúnarsdóttir hefur komið fram sem einsöngvari víða um heim og hér á landi, sungið einsöng í kirkjulegum verkum t.d. í Hallgrímskirkju, Áskirkju og Vídalínskirkju. Hún hefur margoft komið fram með Sinfóníuhljómsveit Íslands, flutt einsöngskantötur eftir Mozart og Bach með Sinfóníuljómsveit áhugamanna og sungið með kammerhópnum Caput. Hallveig hefur sérstaklega verið virk í flutningi nýrrar tónlistar og hefur frumflutt mörg ný íslensk verk, t.d. á Listahátíð í Reykjavík og á Sumartónleikum í Skálholti.
Gerrit Schuil hefur komið fram á tónleikum viða um Evrópu, Bandaríkin og í Asíu. Í nokkur ár stjórnaði Gerrit hljómsveitum hollenska útvarpsins sem og hann hefur einnig stjórnað fjölda annarra evrópskra og amerískra hljómsveita bæði á tónleikum og í óperuuppfærslum. Gerrit settist að á Íslandi árið 1992 og hefur verið leiðandi í tónlistarlífi landsins og haldið fjölda tónleika, stjórnað Sinfóníuhljómsveit Íslands, Norðurlands, Kammersveit Reykjavikur og uppfærslum Íslensku óperunnar. Þá hefur hann stýrt tónlistarhátiðum og leikið á geisladiskum með mörgum af bestu söngvurum og hljóðfæraleikurum landsins. Gerrit er einnig kennari hjá Listaháskóla Íslands og Söngskóla “Sigurðar Demetz”.
Í dagbókinni á heimasíðu Garðabæjar eru nánari upplýsingar um tónleikaröðina.