21. nóv. 2007

Forseti Íslands setti forvarnadaginn í Garðaskóla

Forseti Íslands, hr. Ólafur Ragnar Grímsson heimsótti Garðaskóla í morgun og setti forvarnadaginn formlega, en hann er haldinn í öllum grunnskólum landsins í dag. Ólafur E. Rafnsson, forseti Íþrótta- og Ólympíusambands Íslands heimsótti Garðaskóla einnig við sama tækifæri, svo og fulltrúar Stjörnunnar, fyrir hönd UMFÍ og fulltrúar Bandalags íslenskra skáta.

Í sérhverjum grunnskóla landsins er í dag dagskrá um þau þrjú heilræði sem rannsóknir sýna að duga best sem forvarnir gegn fíkniefnum en þau eru:

Unglingar sem verja í það minnsta klukkustund á dag með fjölskyldum sínum, eru síður líklegir til að hefja neyslu fíkniefna

Ungmenni sem stunda íþróttir og annað skipulagt æskulýðsstarf falla mun síður fyrir fíkniefnum

Því lengur sem ungmenni bíða með að hefja áfengisneyslu, þeim mun ólíklegra er að þau verði fíkniefnum að bráð

Nemendur vinna í umræðuhópum og svara spurningum um hvert þessara þriggja atriða. Svörin verða grundvöllur að skýrslu sem kynnt verður víða á fyrstu mánuðum næsta árs. Einnig munu nemendur taka þátt í ratleik á netinu sem aðstandendur forvarnadagsins hafa efnt til.

Í Garðaskóla hafa nemendur 9. bekkja unnið verkefni sem tengjast forvarnadeginum í lífsleiknitímum að undanförnu.

Forvarnardagurinn er haldinn að frumkvæði forseta Íslands og eru aðstandendur hans Samband íslenskra sveitarfélaga og Reykjavíkurborg, Íþrótta- og Ólympíusamband Íslands, Ungmennafélag Íslands og Bandalag íslenskra skáta. Hann er byggður á rannsóknum sem fram hafa farið við Háskóla Íslands og Háskólann í Reykjavík.