IKEA kostar stöðu kennsluráðgjafa í list-, verk- og iðnhönnun í skólum Garðabæjar
IKEA á Íslandi og Garðabær fyrir hönd Hönnunarsafns Íslands hafa gert með sér samning um að IKEA kosti stöðu nýs starfsmanns sem mun gegna starfi kennsluráðgjafa og kynningarfulltrúa í list-, verk- og iðnhönnun og m.a. starfa í grunnskólum Garðabæjar.
Markmið samningsins er að stuðla að aukinni vitund hjá skóla- og menningarstofnunum Garðabæjar á þróun hönnunar og gildi hennar fyrir ímynd bæjarfélagsins.
Helsta hlutverk nýja starsfmannsins er ráðgjöf og fræðsla til skóla Garðabæjar um kennslu í list-, verk- og iðnhönnun. Hann mun einnig hafa frumkvæði að sýningum, kynningum og öðrum starfstengdum framkvæmdum.
IKEA á Íslandi greiðir allan kostnað sem til fellur vegna verkefnisins.
Aðilar eru sammála um að með ráðningu kennsluráðgjafa og kynningarfulltrúa og byggingu nýs húsnæðis fyrir Hönnunarsafn Íslands í nýjum miðbæ Garðabæjar, verði til ákjósanlegar aðstæður fyrir lifanid list-, verk- og iðnhönnun í bænum.
Auglýst verður eftir kennsluráðgjafa og kynningarfulltrúa á næstu dögum.