18. maí 2007

Þrjú verkefni frá Garðabæ tilnefnd til foreldraverðlauna Heimilis og skóla

Þrjú verkefni frá Garðabæ voru tilnefnd til foreldraverðlauna Heimilis og skóla sem veitt voru í vikunni.

Tvö verkefnanna eru frá Flataskóla

Annars vegar verkefnið Fjölmenningarhátíð en þar voru þau Ingibjörg Baldursdóttir bókasafnsfræðingur og Vilhjálmur Kári Haraldsson í fararbroddi. Foreldrafélag skólans tilnefndi þau til verðlaunanna.
Fjölmenningarhátíðin var haldin 26. september 2006 en þá var nemendum sem eiga erlendan föður og/eða móður boðið á hátíð ásamt foreldrum sínum. Nemendur sögðu frá menningu sinni og tungumáli, sýndu fatnað og spjölluðu saman. Markmiðið var að skapa samkennd meðal nemenda. Í rökstuðningi foreldrafélagsins segir að allir sem komu hafi haft gagn og gaman að hátíðinni.

Flataskóli tilnefndi einnig foreldrafélag skólans til verðlaunanna fyrir verkefnið 10 ráð handa foreldrum og nemendum. Foreldrafélagið fékk Pál Ólafsson, félagsráðgjafa, til liðs við sig vegna námskeiðs haustið 2006 þar sem rætt var um samskipti. Námskeiðið, sem var fyrir nemendur í 7. bekk og foreldra þeirra, var sérstaklega hugsað sem undirbúningur fyrir unglingsárin. Mikil almenn ánægja var með fyrirlestrana og fyrirkomulag fræðslunnar.

Heimasíða Hofsstaðaskóla og Elísabet Benónýsdóttir vefstjóri hlutu einnig viðurkenningu en vefsíðan þykir einstaklega aðgengileg og lifandi eins og fram kemur í rökstuðningi foreldrafélags skólans sem sendi inn tilnefninguna. Fréttir og myndir frá skólastarfinu birtast nánast jafn óðum á vefnum og þannig geta foreldrar að vissu marki tekið þátt í skólastarfinu. Elísabet er umsjónarmaður vefsíðunnar auk þess sem hún aðstoðar kennara og foreldra við að koma inn myndum á bekkjarsíður.

Vilhjálmur Kári Haraldsson og Ingibjörg
Baldursdóttir í Flataskóla

Elísabet Benónýsdóttir, kennsluráðgjafi
í upplýsingatækni í Hofsstaðaskóla