Franskt menningarvor í Garðabæ

Franskt menningarvor á Íslandi er viðamikil frönsk menningarveisla sem stendur yfir á Íslandi vorið 2007.  Dagskráin var formlega sett við upphaf Vetrarhátíðar í Reykjavík núna í febrúar og stendur fram í maí.

Frönsku listamennirnir M/M sem er samstarfsverkefni Mathias Augustyniak og Michael Amzalag taka þátt í frönsku menningarvori og á næstu dögum verða þeir við vinnu í Hönnunarsafni Íslands í Garðabæ. Í samstarfi við listakonuna Gabríelu Friðriksdóttur munu þeir vinna skissur og teikningar í sýningarsal safnsins að Garðatorgi.  Teikningarnar tengjast vinnu við útilistaverk sem verður sett upp á Urriðaholti með vorinu í samstarfi við landeigendur. Skissurnar og teikningarnar verða til sýnis á Hönnunarsafninu á næstu vikum, nánar verður auglýst síðar um hvenær hægt verður að skoða hugmyndavinnuna sem birtist í teikningunum.

M/M hafa með fjölbreyttu starfi sínu á sviði hönnunar, tónlistar og tísku endurheimt og endurskilgreint samskiptamáta og mótun sjálfsmynda. M/M hafa í mörg ár unnið náið með listamönnum s.s. Phillipe Parreno, Pierre Huyghe, Inez van Lamsweerde, Vinoodh Matadin, og Gabríelu Friðriksdóttur og hafa þeir sýnt afurðir slíks samstarfs á Feneyja-tvíæringnum undanfarin fjögur ár. Að auki sýndu þeir í London’s Institute of Contemporary Arts árið 2001 og í Palais de Tokyo í París, árið 2005. M/M hafa einnig unnið fyrir Björk. Verk M/M deila mörgum formlegum eiginleikum og hugtakahluttekningu með stefnu „Design Art“ hreyfingarinnar sem undanfarin 15 ár hefur orðið æ mikilvægari innan listaheimsins.

Lykilverk þeirra hafa verið unnin í afar ólíka miðla. Til dæmis má nefna veggspjöld, hátalara, frístandandi myndaramma, lampa úr plexígleri og teppaflísar. Sérkenni M/M birtast í hinum fjölbreyttu samvinnuverkefnum þeirra.

Þeir halda áfram auðkennarannsóknum sínum og munu búa til skúlptúr sem verður festur í íslenska jörð, uppi á Urriðaholti í Garðabæ. Þetta meistarastykki verður innblásið af rótum Íslands og mun draga saman þræði allra verka M/M til dagsins í dag. Skúlptúrinn verður fyrsta mannvirkið sem rís í nýju hverfi í Urriðaholti í Garðabæ.

Sjá einnig nánar á www.fransktvor.is og www.urridaholt.is