Dagur gegn einelti
Fimmtudaginn 8. nóvember var haldinn sérstakur baráttudagur gegn einelti. Dagurinn var nú haldinn í annað sinn að frumkvæði verkefnastjórnar gegn einelti hér á landi. Í Garðabæ tóku skólar þátt með ýmsum hætti til að vekja athygli á þessum baráttudegi. Þó að þessi dagur sé sérstaklega tileinkaður einelti þá er markvisst unnið að einelti allt árið um kring í skólunum.
Horft á myndband kvennalandsliðsins í fótbolta
Í Flataskóla var horft á myndbandið sem kvennalandsliðið í fótbolta gerði um einelti, unnið var með textann og málið rætt í öllum bekkjum. Nemendur í Flataskóla gerðu veggspjöld með slagorðum gegn einelti sem hanga uppi í anddyri Ásgarðs íþróttahúsi Garðabæjar, á Garðatorgi og í skólanum.
Undanfarna daga hefur starfsfólk og nemendur Hofsstaðaskóla unnið að fjölbreyttum verkefnum í tengslum við jákvæð samskipti. Á fjölgreindaleikunum, sem fram fóru dagana 31. október og 1. nóvember, unnu allir nemendur skólans í 13-14 manna hópum sem fóru á milli stöðva þar sem leyst voru ýmis verkefni. Finna má verkefni nemenda á Garðatorgi, fyrir utan bókasafnið. Þann 8. nóvember fengu allir nemendur Hofsstaðaskóla gul armbönd með áletruninni "Jákvæð samskipti" til að minna á mikilvægi jákvæðra samskipta. Margir nemendur fengu kynningu frá Gunnhildi Yrsu landsliðskonu í fótbolta þar sem hún ræddi um mikilvægi jákvæðra samskipta og mikilvægi þess að fagna fjölbreytileikanum og sýndi þeim myndbandið sem landsliðiskonurnar gerðu.
Í Fréttablaðinu birtist nýverið grein eftir Elvu Björk Ágústsdóttur námsráðgjafa Hofsstaðaskóla þar sem hún hvetur fólk til að deila góðum hugmyndum í baráttunni gegn einelti.
http://visir.is/leynast-god-verkefni-eda-urraedi-i-pokahorni-thinu-/article/2012711079983
Gagn og gaman dagar í Garðaskóla
Í Garðaskóla standa yfir ,,Gagn og gaman dagar" þar sem hefðbundið skólastarf er brotið upp og í boði eru ýmsar vinnusmiðjur fyrir nemendur. Á Garðatorgi hanga uppi spjöld eftir nemendur sem eru verkefni sem þeir hafa unnið með umsjónarkennurum sínum um samskipti og einelti. Þar var lögð áhersla á að allir tækju afstöðu gegn einelti hvers konar og fram fór hugstormun og umræða við vinnslu verkefnanna. Skólastjóri skólans sendi einnig öllum foreldrum bréf þar sem tekið er á tilteknum atriðum sem varða forvarnir gegn einelti á meðal unglinganna okkar.
Á heimasíðunni www.gegneinelti.is er hægt að skrifa undir þjóðarsáttmála gegn einelti.