Góðir gestir frá Shanghai
Sendinefnd frá borginni Shanghaí í Kína heimsótti bæjarskrifstofur Garðabæjar miðvikudaginn 12. september. Tilgangur heimsóknarinnar var að fræðast um með hvaða hætti Garðabær eflir samstarf við félög og félagasamtök sjálfboðaliða. Í sendinefndinni voru embættismenn sem vinna hjá borginni Shanghaí á sérstakri skrifstofu sem heldur utanum sjálfboðastarf hjá ýmsum félögum og stofnunum.
Heimsókn í ráðhús Garðabæjar
Gunnar Einarsson bæjarstjóri tók á móti hópnum og sýndi þeim bæjarskrifstofurnar og hélt erindi þar sem farið var yfir ýmis mál er varðar samstarf við félög og samtök í Garðabæ og mikilvægi þess. Fulltrúarnir frá Shanghaí voru mjög áhugasamir um hvernig þessum málum er háttað í Garðabæ en einnig um hvernig félög og samtök starfa í samvinnu við ríkisstofnanir og sveitarfélög á landsvísu. Sendinefndin sagðist geta tekið sér margt til fyrirmyndar í starfi Íslendinga og voru ánægðir með heimsóknina í Garðabæinn.