Stóra upplestrarkeppnin 2012
Nemendur úr Hofsstaða- og Flataskóla hnepptu fyrsta og annað sætið á Lokahátíð Stóru upplestrarkeppninnar í 7. bekk 2011-2012 sem fór fram við hátíðlega athöfn í Félagsheimilinu á Seltjarnarnesi fimmtudaginn 15. mars. Á lokahátíðinni kepptu tíu nemendur í grunnskólum í Garðabæ og í grunnskóla Seltjarnarness og var keppnin jöfn og spennandi í ár.
Vigfús Höskuldur Orri Árnason í Hofsstaðaskóla lenti í fyrsta sæti, Klara Hjartardóttir í Flataskóla í öðru sæti og í þriðja sæti var Melkorka Gunborg Briansdottir í Valhúsaskóla.
Í keppninni lásu nemendur svipmyndir úr skáldsögunni Draugaslóð eftir Kristínu Helgu Gunnarsdóttur og ljóð eftir Gyrði Elíasson auk ljóða sem þeir völdu sjálfir.
Allir þátttakendur fengu Ljóðabók eftir Gyrði Elíasson í viðurkenningarskyni. Ásgerður Halldórsdóttir bæjarstjóri Seltjarnarness afhenti bókina. Hanna Óladóttir, formaður dómefndar afhenti verðlaunahöfunum viðurkenningarskjöl frá Röddum, samtökum um vandaðan upplestur. Auk þess fengu sigurvegarar gjafbréf frá Eymundsson.
Hátíðin tókst í alla staði vel en auk upplestrar buðu skólarnir upp á fjölbreytt skemmtiatriði. Fyrir hönd Hofsstaðaskóla flutti Jóhannes Patreksson í 6. BÓ Beat box við mikinn fögnuð gesta.