25. jún. 2020

Nýr leikskólastjóri Hæðarbóls

Jóna Rósa Stefánsdóttir hefur verið ráðin leikskólastjóri við leikskólann Hæðarból. Hún tekur við starfinu af Sigurborgu Kristjánsdóttur sem lætur af störfum í ágúst.

Jóna Rósa lauk námi í leikskólakennarafræðum frá HA árið 2004 og MA námi í forystu og stjórnun frá Bifröst á þessu ári. Hún hefur starfað sem leikskólakennari og deildarstjóri á Hæðarbóli og frá árinu 2011 var hún staðgengill leikskólastjóra á ungbarnaleikskólanum Sunnuhvoli. Barnsskónum sleit Jóna Rósa í Skagafirði en hún hefur verið búsett í Garðabæ síðastliðin 20 ár.

Jóna Rósa hefur tekið þátt í ýmsum verkefnum er lúta að námi barna á leikskólastigi þar má nefna þróunarverkefnið „Skipulögð hreyfing með yngstu börnum leikskólans“. Síðustu ár hefur Jóna Rósa tekið þátt í verkefninu ,,Tökum skrefin saman“ sem er samvinnuverkefni þriggja leikskóla í Garðabæ unnið í samstarfi við Menntavísindasvið Háskóla Íslands. Verkefnið felur m.a. í sér að þróa nám fyrir börn 12-18 mánaða gömul og með því hefur skapast mikilvæg þekking sem hefur verið miðlað til leikskólasamfélags Garðabæjar.