Rafskútur Hopp í Garðabæ
Íslenska fyrirtækið Hopp hefur unnið að því síðustu daga að fjölga rafskútum á höfuðborgarsvæðinu og eru nú komnar rafskútur frá fyrirtækinu sem hægt er að leigja og keyra um í Garðabæ.
-
Jóna Sæmundsdóttir, formaður umhverfisnefndar Garðabæjar, Sæunn Ósk Unnsteinsdóttir, framkvæmdastjóri Hopp og Gunnar Einarsson bæjarstjóri Garðabæjar.
Íslenska fyrirtækið Hopp hefur unnið að því síðustu daga að fjölga rafskútum á höfuðborgarsvæðinu og eru nú komnar rafskútur frá fyrirtækinu sem hægt er að leigja og keyra um í Garðabæ.
Rafhlaupahjól hafa notið sífellt meiri vinsælda á undanförnum árum bæði hérlendis sem erlendis. Á síðasta ári veitti Garðabær fyrirtækinu OSS nýverið aðstöðuleyfi fyrir rafhlaupahjólum sem og rafhjólum sem hafa nýst Garðbæingum vel. Með tilkomu Hopp munu valkostir íbúa við að velja sér umhverfisvænni samgöngumáta aukast enn fremur.
Hopp var stofnað fyrir tveimur árum og eru notendur nú sagðir um 75 þúsund. Hafa notendur „hoppað“ yfir milljón kílómetra sem svarar til um 25 ferða í kringum hnöttinn. Nýju skúturnar frá Hopp eru sagðar búa yfir ýmsum eiginleikum, s.s. stefnuljósi, símahaldara með þráðlausri hleðslu, tvöföldum hemlum og nýjum standara.
Umhverfisvænn samgöngukostur
Í umhverfisstefnu Garðabæjar er eitt af markmiðunum að draga úr aukningu umferðar og þar með neikvæðum umhverfisáhrifum frá umferð. Notkun rafknúinna farartækja hvort sem það eru rafbílar, rafhjól eða rafhlaupahjól verður sífellt algengari meðal íbúa Garðabæjar sem og annara landsmanna enda umhverfisvænir samgöngukostir.
Garðabær hefur þannig lagt mikla áherslu á uppbyggingu góðra göngu- og hjólastíga innanbæjar til að efla vistvænar samgöngur og gangandi og hjólandi umferð hefur aukist mikið að undanförnu.